Perorsaasut ilinniarsimasut pisariaqartinneqartut Perorsaanermut Ilinniarfiup ukioq 2017-imi angummaffigisinnaalissavai.

Aamma perorsaasutut ilinniarnerup qaffasssarnissaa naalakkersuinikkut tapersersorneqarpoq. Naalakkersuisunut ilaasortanik pingasunik peqateqarluni Perorsaanermik Ilinniarfimmi isumasioqatigiittoqareernerani Ilinniarfiup pisortaa, Nuka Kleemann, taama oqarpoq. Naalakkersuisut siulittaasuata, Hans Enoksenip, Ilinniartitaanermut naalakkersuisup, Tommy Marø-p, aamma inuussutissarsiutinut naalakkersuisup, Siverth K. Heilmann-ip, ilinniartitaanerit siunissaat tassani isummersorfigaat. Nuka Kleemann ima oqarpoq:
februaarip 11-at 2008 15:58

-Isumaqatigiissutigaarput soorlu bachelorinngorniarluni ilinniarneq aallartittussatut maannakkut takorloorneqartoq tapersersorluarneqartoq, taavalu aamma ilinniartitaanerit allat, soorlu isumaginninnermik ikiortinngorniartut, taakku ilinniartitaanerisa suli pitsanngorsaqqinnissaa aamma takorloorneqarpoq.

Perorsaanermik Ilinniarfiup maanna inissisimanera imaappoq, 1960-ikkunnili illorsuaq sanaaq qanganitsersimasoq, kantiinatut sanaaq, ilinniarfittut maanna atorniarsaraarput, amerlanertigut inissaaleqingaatsiartarluta, taamaattumik siornaalli pilersaarutiginikuusarput, ilinniarfiup allineqarnissaa, maanna naqissuseqqinneqarpoq, 2009-mi aallartittussatut pilersaarutaalluni, taannartaa assorujussuaq qujanarpoq, politikkikkut maanna taamatut tapersersorneqarnerput, Nuka Kleemann oqarpoq, nangillunilu:

-Una pingaarnerpaajussaaq perorsaasunik holdinik marlunnik ukiaru aallartitsisinnaalissagatta, perorsaasussaaleqinerput tusartuagarput ilisimaarisarpullu, qaangerniarsaralalugu.

Perorsaasunngorniarnermut tunngatillugu holdit marluk aallartittalerpata perorsaasut amerlanerit ukiumut soorunami naammassisalissapput, siunissamilu neriuutigaarput, aamma eqqarsaatersuutigalugu, perorsaasut maanna amigaatigisavut 2017-ip missaani aatsaat angusinnaassagatsigik, Ilulissani Perorsaanermik Ilinniarfimmi pisortaq, Nuka Kleemann oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq