Perorsaasut ilinniarsimasut Peqatigiiffiat ataatsimeersualerpoq
Perorsaasut Ilinniarsimasut Peqatigiiffiat PIP sinerissami immikkoortortani siulittaasunik ukioq allortarlugu ataatsimeersuartitsisartoq aqagu qulingiluassaanik ataatsimiilissaaq. Soraarnerussutisiaqalersussat, Meeqqerivitsialak Eqqartuussinerlu maanna ingerlasoq, eqqartugassat ilagaat.
Soorunami perorsaasutut sulisut sulinerminni sullitaasalu atugaat eqqartugassanut ilaapput. Aamma eqqartorneqartussaassaaq Danmarkimi sumiiffinni arlalinni perorsaasut angajoqqaat allallu susassaqartut suliumajunnaarnerat.
Allagaqarluta tapersersuinitsinnik nassiussaqarnikuuvugut. Kisianni tapersersuilluta suliumajunnaarnissaq pilersaarutaanngilaq aamma taanna aningaasassaqartinneqanngilaq Naassunnguaq Bisgård PIP-ip siulittaasua oqarpoq.