Perorsaasut ilinniarsimasut aningaasarsiaat qaffattariaqarsoraat
Perorsaasoq ilinniakkaminik naammassinneqqammertup qaammammut aningaasarsiarai 17.500 koruunit, tassalu aningaasarsiat appasinnerannut peqqutaavoq perorsaasunik ilinniarsimasunik ulloq unnuarlu inissiisarfinni atorfinititsisoqarsinnaannginnera. Tamanna ulloq unnuarlu angerlarsimaffinni sullissisunit oqaatigineqarpoq, taamatullu Namminersorlutik Oqartussat 2011-imi misissuisitsineranni ersersinneqarluni.
Ilaqutariinnermut ataatsimiititaliami siulittaasoq Olga P.Berthelsen, isumaqarpoq perorsaasut ilinniarsimasut aningaasarsiaat isiginiarneqarluarnerusariaqartoq.
- Ukiualunnguit matuma siorna, peqqinnissaqarfiup iluani annertuumik ajornartorsiuteqaratta. Taamani immikkut iliuuseqartoqarpoq, tassa peqqissaasut aningaasarsiaat qaffanneqarput. Kinguneraalu, peqqissaasut ullumikkut tigummiinarsinnaanerulerneranik. Perorsaasunut periuut tamanna aamma atorneqarsinnaavoq, Olga P. Berthelsen oqarpoq.
Perorsaasut ilinniarsimasut peqatigiiffiat, akissarsiat sulinermilu atukkat pillugit Namminersorlutik Oqartussanut KANUKOKA-mullu isumaqatiginninnialeruttorput.
Siumumiit oqaatigineqarportaaq, perorsaasunut ilinniarsimasunut aningaasarsiat pitsaanerusariaqartut.
- Ulloq unnuarlu angerlarsimaffiit unnuarsiortussaaleqisarput, immaqa aningaasanik amerlanerusunik tapilerlugit iliuuseqaraani tassuunakkut pilerinarsaasoqarsinnaavoq, Siumut sinnerlugu Inatsisartuni ilaasortaq Ruth Heilmann oqarpoq.
Kommunit annertunerusumik periarfissinneqartariaqartut Kommuneqarfik Sermersuumi borgmesteri Asii Chemnitz Narup isumaqarpoq.
- Kommunit periarfissinneqartariaqarput, pikkorersartoqareerneratigut tapinik tunniussisinnaallutik, imannak sunarujussuaq isumaqatiginninniarneq annertooq oqimaatsorlu aqqusaaqaarnagu. Kommunit tassuuna pisinnaatitaaffipput annertusarneqartariaqaraluarpoq, Kommuneqarfik Sermersuumi borgmesteri Asii Chemnitz Narup oqarpoq.
