Perorsaasut amigaataajuarsinnarput
KANUKOKA aamma Namminersornerullutik Oqartussat, isumaginninnermik suliaqartut sulinerminni atugaat pillugit 2002-mi misissuisitsipput.
- Misissuineq taanna pissutigalugu maanna pisoqalereerpoq, PIP-mit oqartoqarpoq, nutaamillu nalunaarusiortoqarnissaa kissaatigalugu, perorsaasut sooq amigaataanersut qulaajarneqarniassammat.
KANUKOKA-p pisortaa, Martha Labansen, aperaarput, nutaamik misissuisoqarneratigut perorsaasut amigaataanerat iliuuseqarfigineqarsinnaanersoq.
- Isumaqarpunga misissuinernik amerlanerusunik pisariaqartitsinata, tassami perorsaasut amigaataanerat nalunngereerparput. Aamma suliniutissatut qinnutiginikuusavut maanna ingerlanneqaleruttorput. Tassa qitiusumik ilinniarfimmi amerlanerusunik ilinniartoqarsinnaalerpoq, aamma sinerissami najugaq qimannagu ilinniarsinnaaneq periarfissinneqarpoq. Massakkullu taamaalilluni Nuummi Sisimiunilu taamatut ilinniartoqarsinnaalereerpoq, Qaqortumilu aallartinnissaa maanna piareersarneqarpoq. Taamaalilluta perorsaasutut ilinnialersinnaasut amerlinissaannut periarfissiivugut.
Taama oqarpoq KANUKOKA-p pisortaa Martha Labansen, perorsaasunik naammattunik kommunit siunissami sulisussarsisinnaanissaat taassuma neriuutigaa.
Ilinniarsinnaasut amerlanerulersinnerisigut neriuppunga kommunit sulisussatik pisariaqartitatik pissarsiarisinnaalissagaat.
Ulapinnerup kingunerisaanik uippakajaalertarneq, nalunaarusiami taaneqartoq iliuuseqarfigineqarsinnaava?
- Ilinniartitsinerit amerlinerisigut amerlanerusullu ilinniartinneqarnerisigut, amerlanerusunik sulisoqalernissaq periarfissiissutigineqassaaq. Aamma Meeqqerivitsialammi anguniagaavoq, ulluinnarni sulinermi malittarisassat tunaartallu tunngavigalugit ingerlasinnaalissasoq. Kiisalu qitiusuminngaanniit siunnersuiuarnerup annertusarneqarneratigut, ulluinnarni suliat qanoq ingerlanneqarsinnaanissaat aallunneqarnerulissaaq. Inuit ataasiakkaat nammineerlutik pisussat tamaviisa piareersarnagit, kisianni nalunngereerlugu suleriaatsit suut aqqutigineqarsinnaasut, KANUKOKA-p pisortaa, Martha Labansen, naggasiivoq.
