Perorsaasut amerlanerorusupput

Nunatsinni perorsaasutut ilinniarsimasut 200-t missaanniittut amigaataassasut, Perorsaasutut Ilinniarsimasut Kattuffiata PIP-p maajip aallaqqaataasiorluni oqaaseqarnermini eqqoriarpaa.

Amigaataasulli siunissami ikileriarnissaat ilimananngillat. Perorsaasutut ukiumut ilinnialerniat 100-t sinneqartaraluartut ukiumut 20-innaanerat tiguneqarsinnaasarnerat allanngortitaariaqartoq, PIP-mi siulittaasoq Naussúnguaq Bisgaard oqarpoq.

- Imatut iliortoqarsinnaavoq, massakkut SPS-imi Ilulissani perorsaasunngorniarluni ilinniarfik ukiumut 20-iinnaat tigusarpaat, taavalu taakku naammanngitsorujussuullutik. Najugaq qimannagu ilinniarfiusinnaasut sinerissami pilersinneqarsinnaasuuppata aamma taanna iluaqutaarujussuassagaluarpoq. Kujataani ilinniarusukkaluartut avannaa ilinniariarfigissallugu ungasigisaqaat. Taavalu immaqa nammineq meerartaareersimalluni ilaquttat qimannissai ajornajusoorsinnaagami. Taamaattumik najugaq qimannagu ilinniarnissaq pingaartorujussuartut PIP-minngaanniit isigineqarpoq. Naussúnguaq Bisgaard oqarpoq.

Aningaasarsiat qaffasinnerusut sulinermilu atukkat pitsaanerusut PIP-p anguniartariaqarsorai.

Naalakkersuisut iliuuseqarnissamut tunngaviusumik isumaqataasut tusartaannarpagut, iliuuseqannginnermulli aningaasat killeqarnerat oqaatigineqakkajuppoq.

Sungiusarfik Aaqa, Nuummiittoq tallimanik perorsaasussarsiorpoq, Najugaqarfik Elisibannguaq Maniitsumiittoq aamma arlalinnik kiisalu Inuusuttut Inaat Qaqortumiittoq sisamanik perorsaasussarsiorluni. Namminersornerullutik Oqartussat nittartagaanni atorfiit ullumikkorpiaq inuttassarsiuussat ilamininngui taakkuupput. Kommunit aamma perorsaasunik amigaateqaqaat, Nuummiinnaq perorsaasut 36-it amigaataallutik.

PIP-mi siulittaasoq isumaqarpoq, perorsaasutut atorfik ilaatigut sapaatip-akunneranut nalunaaquttap akunnerini 60-70 tiimini suliffiusoq akissaatiluffiuallaartoq.

-Soorunalimi perorsaasut ilinniarsimasut akissaatiginnerulernissaat suaartaatigiuassavara, aamma sullitagut ullumikkut sakkortusiartuinnarmata. Meeqqat inuusuttullu pissusaat sakkortusiartortoq taavalu ulloq unnuarlu angerlarsimaffinni pisartut meerannguit pissusaat sakkortusiartorput, taavalu uagut allatut ajornaqimmat perorsaasut taama amigaataatigisut marloriaammik pingasoriaammik ulapilluta suliariaqarluta. Qasunartorujussuuvoq, taavalu aamma sulipiloornerujussuaq aningaasarsianut annikitsigisumik soorunami perorsaasunut peqqinnanngilluinnaqqissaarpoq.

Perorsaanermik Ilinniagaqarsimasut Peqatigiiffiata siulittaasua Naussúnguaq Bisgaard taama oqarpoq. PIP-p aaqqissugaanik ullumi maajip aallaqqaataani ingerlaaqatigiittoqarpoq, tusaasinnaasassitullu Peqatigiiffiup allaffeqarfia inuaqerpaluppoq.

Inuit 50-it ingerlaaqatigiinneq peqataaffigisaat Inatsisartut ataatsimiittarfiata silataani oqalugiarnernik naggaserneqaraluartoq, ilaasortat pakatsissutigeqisaannik, politikeri ataasiinnannguarluunniit anillanngilaq.

Ilaqutariinnermut Naalakkersuisoq Aleqa Hammond Perorsaasut uparuaataannut atatillugu oqaaseqartinniaraluaratsigu iluatsinngilarput.