- Naammanngilaq naammannikuunngisaannarporlu, Kommuneqarfik Sermersuup meeqqanut atuarfeqarnermullu ataatsimiititaliaata siulittaasua, Michael Rosing kommunip perorsaasussaaleqinermut iliuusai pillugit oqarpoq.Assi: KNR / Malik Brøns

Perorsaasussaaleqineq: Kommuneqarfik Sermersuup inatsisit unioqqutikkai

Perorsaasut akissarsiaqarnerulinngippata nunatsinni meeqqeriviit perorsaasunik amigaateqaannassapput. Kommuneqarfik Sermersuup meeqqanut atuarfeqarnermullu ataatsimiititaliaata siulittaasua, Suleqatigiissitsisuneersoq Michael Rosing taama oqarpoq.

Inatsisit naapertorlugit meeraaqqerivimmi meeqqat amerlanerpaamik aqqaneq-marluk sulisunit ikinnerpaamik pingasunit paarineqartartussaapput. Sulisut taakku tassaassapput, perorsaasoq ataaseq, perorsaanermik ilinniarsimasoq ataaseq ikiortilu ataaseq.

Tamannali Nuummi meeraaqqerivimmi Ungaavaqqami malinneqanngilaq.

AAMMA ATUARUK Meeraaqqerivimmiittumut ataatap perorsaasunik amigaateqarneq ernumagigaa

Tassani sulisut sisamat meeqqanik 30-nik septembarip ulluisa aappaani paarsisimasut meeraaqqeriviup pisortaata paasisimavaa. Tassalu kommunip inatsisit unioqqutippai.

- Naammanngilaq naammannikuunngisaannarporlu, Kommuneqarfik Sermersuup meeqqanut atuarfeqarnermullu ataatsimiititaliaata siulittaasua, Michael Rosing oqarpoq.

AAMMA ATUARUK Perorsaasut aningaasarsiakippallaarnerat pissutaasinnaasoq

Kommunili sapinngisani tamaat iliuuseqarniarsarisoq taanna oqarpoq, meeqqerivinnilu perorsaasussaaleqineq ingammik marlunnik pissuteqarsoraa.

Meeqqanut suli atualinngitsunut perorsaanikkut inerikkiartuutaasunik ulluunerani neqeroorutit pillugit Inatsisartut inatsisissaattut siunnersuut nr. 16, 3. december 2012-meersumit:

 

§ 11.  Meeqqeriviit pilersinneqassapput 0-imiit 2-nik ukiulinnut meeraaqqerivittut, 3-miillu 6-inut ukiulinnut meeqqerivittut, 0-imiit 6-inut ukiulinnut meeqqat ukiui naapertorlugit agguaassiviusumik meeqqerivittut.
Imm. 2.  Meeqqeriviit meeqqanut ataatsimoortunut agguaanneqassapput, meeqqerivinni meeqqat ataatsimoortut amerlanerpaamik 20-nik meerartaqarsinnaallutik, meeraaqqerivinnilu amerlanerpaamik 12-inik.

 

§ 20.  Meeqqat ataatsimoortut tamarmik, tak. § 11, imm. 2, minnerpaamik sulisorissavaat perorsaasoq 1, perorsaanermik ilinniarsimasoq 1 ikiortilu 1. Sungiusarlutik sulisut tapersersortaasullu sulisut amerlassusissaannut ilaatinneqanngillat.

Akissarsiakinneq piumaneqarnerlu

Akissarsiat aporfiunerpaajusorai.

- Ilisimasakka malillugit Danmarkimi nunatsinnilu perorsaasutut atorfiit akissarsiatigut nikingassutaat 8.000 koruuniuvoq. Tamatumunngalu peqatigitillugu tamaani pisiassat akisunerupput. Tamanna perorsaasutut ilinniarnissamut sulinissamulluunniit kajuminnerulersitsinavianngilaq, Michael Rosing oqarpoq.

Perorsaasutullu sulerusuttut amerlanngitsut ajornartorsiutitut aappaattut taavaa. Tamanna sulisunik ilinniarsimanngitsunik ilinniariartitsinermigut kommunip iliuuseqarfiginiarsarigaa, Michael Rosing oqarpoq.

AAMMA ATUARUK Perorsaasut sulisussaaleqineq pissutigalugu stressilersartut

- Ilinniagartik naammassigaangamikku allami akissarsiffiunerusumi ajoraluartumik suliffittaartarput, Michael Rosing oqarpoq. 

Akissarsiat qaffassinnaanngikkaat

Kommuni akissarsianik qaffaanissaminut akissaqarunaraluartoq Michael Rosing oqarpoq.

- Perorsaasut amigaatigeqisagut akissarsiaqarnerutilernissaannut missingersuutitsinnit nassaarsinnaasugut qularinngilara. Akissarsiaqarnerutinnissaannulli akuerineqarsinnaatinnata maani inissisimavugut, Michael Rosing oqarpoq.

Namminersorlutik Oqartussat perorsaasullu kattuffiata perorsaasut akissarsiaat isumaqatigiinniutigisarpaat.

AAMMA ATUARUK Meeqqat siunissaat pillugu aaqqiissoqartariaqarsoraa

Perorsaasussaaleqineq ukiorpassuit ajornartorsiutaavoq. Sinaakkutillu allanngortinnagit ajornartorsiutaaginnassasoq, Michael Rosing isumaqarpoq.

- Atukkat allanngortinnagit ajornartorsiut aaqqinneqarsinnaasorinngilara, Michael Rosing oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat