Perorsaasussaaleqineq amerlasuutigut kinguneqarnerluttarpoq

Radioaviisip misissuinerani paasineqarpoq Kalaallit Nunaani perorsaasut ilinniarsimasut 200-it missaat amigaatigineqartut.

Isumaginninnermi Siunnersortinngorniat Ilinniarfianni ilinniartitsisoq kiisalu inunnik isumaginnittutut ilinniarsimasoq Bertha Dalager isumaqarpoq

Perorsaasut ilinniarsimasut amigaataanerisa kingunerisaraat meeqqat sumiginnakkat meeqqerivinniinerini malugiitsoorneqartarneri.

- Nammineq misilittakkakka malillugit, meeraq immikkut pisariaqartitsilersimasoq, siusissukkut iliuusigineqarfigineqarsimanngikkaangami aataat meeqqat atuarfianni pigaangami ikiorsiiffigineqartarpoq. Taasumap kinguneranik inunnik isumaginnittoqarfimmi suliassat annertusisarput. Naak tamanna pinngitsoorneqarsimasinnaagaluartoq perorsaasunik ilinniarsimasunik naammattunik atorfeqartoqartuupat, Bertha Dalager oqarpoq.

Kisitsisit radio-aviisip katersorsimasaani takuneqarsinnaavoq perorsaasutut ilinniarsimasut 200-ut missaaniitut amigaatigineqartut. Bertha Dalager aperaarput tamanna kisitsi qanoq igineraa.

- Ilisimavara meeqqerivinni sulisut amerlanerit ilinniarsimasuuneq ajortut. Aamma taakkua sapinngisatit tamaat sulisut nalunngilara. Nalunngilara perorsaasut ilinniarsimanngitsut amigaatigisaraat perorsaasunik ilinniarsimasunik immersorneqarnissartik, ilitsersuuneqarnissartillu, Bertha Dalager oqarpoq.

Ullumikkut Kalaallit Nunaanni perorsaasutut atorfiit 400-t sinneqarput, taakkunanngali taamaallaat 187-it inuttaqartsinneqarlutik.