Perorsaasoq: Meeqqat tusaaneqartariaqarput

Meeqqat inuiaqatigiinni ilaapput taakkunanilu pingaaruteqarlutik. Tamatuminnga tusartinneqartarnissaat pingaartuusoq, perorsaasoq Juliane Geisler Dalager isumaqarpoq. Meeqqat ullorsiorneranni meeqqat 200-t missaanniittut Katuamiipput.
Allattoq Jens Thorin
juunip 01-at 2010 11:37

Juliane Geisler Dalager meerarpassuit ilagalugit marlunngornermi ullaap tungaani Nuummi Katuamiippoq, FN-ip meeqqanut ullorititaa malunnartinniarlugu.

Isumaginninnermut naalakkersuisoq Maliina Abelsen meeqqat ulluannik malunnartitsinissamut aggersaasuuvoq.

- Ullumikkut nalliuttorsiutigivarput meeqqat tamarmik ajunngitsumik inuuneqarsinnaatitaanerat, taamaammat inersimasut meeqqat tamaviisa paarilluartussaavaat. Immitsinnut ajortumik pisassanngilagut, meeqqallu ikiorneqarusukkaangamik aamma ikiorneqartassaput. Neriuppunga ulloq ajunngitsumik nuannersumillu atorumaarissi. Meeqqat tamassi pilluaritsi, Maliina Abelsen ilaatigut oqarpoq.

Nuannaaqqusineq meeqqat meeqqerivinneersut, angerlarsimaffinni paaqqinniffinneersut sulilu atualinngitsut tusarpaat. Sisamanik ukiulik, Storm, nuannaaqisoq aperaarput, Katuami susoqalernersoq:

- Pissittaartoqalersoq. Kaagitortoqalersoq. Titartaasoqalersoq.

Perorsaasoq Juliane Geisler Dalager oqarpoq, meeqqat tusaaneqarnerunissaannut ulloq atorneqartariaqartoq.

- Ullutsinni meeqqat isumaat tusarnaarluaraanni annertoorujussuarmik pigisaqarput, uagut inersimasut ilaanni paasiniaanngikkaangatta, tusaanngitsoortakkatsinnik.