Perorsaanermut pikkorissaaneq kingusinaaraluarluni aallartilerpoq
Tamanna pillugu Ilaqutariinnermut Peqqissutsimullu Naalakkersuisoqarfimmi ilaqutariinnut immikkoortortaqarfimmi pisortaq Susie Marthin ima oqarpoq.
- Maanna angajoqqaanngortussat pikkorissartinneqartalernissaannik Jens B. Frederiksenip 2006-imi ukiakkut siunnersuutaa ulapputigileruttorparput. Taanna inatsisartunit akuerineqarpoq. Isumaqatigiissutilli sukumiisut suliarilinnginnerini aningaasanut inatsik ukioq mannamut atuuttoq naammassisseeqqaaratsigu kingusinaarluta angajoqqaanik pikkorissaasarneq aallartittussanngorparput.
- Pikkorissaasussat isumaginninnermut ikiortiusinnaapput, napparsimasunik paarsisut ernisussiortulluunniit. Taakku illoqarfigisaminni angajoqqaanngortussanut pikkorissaanermik ilinniartitsissutit assigiinngitsut atorlugit upernaaru marsimi ilinniartinneqassapput, taama oqarpoq, Namminersornerullutik Oqartussani ilaqutariinnermut immikkoortortaqarfimmi pisortaq Susie Marthin.
Angajoqqaanngortussanik pikkorissaasarneq maannakkuugallartoq 1,2 millioninik aningaasaliiffigineqarpoq. Ukiullu tulliuttut pingasut 1.millioninik aningaasaliiffigineqartarnissaa aalajangiunneqarpoq. 2007-imi ernisut 850-iupput.
