Permanent Forum New Yorkimi ataatsimiilerpoq
Nunat inuiisa atugaat pillugit Naalagaaffiit Peqatigiinni isummersoqatigiiffik Permanent Forum tallimassaanik ataatsimiissalluni New Yorkimi ullumi ataatsimiilluni aallartippoq.
Nunatsinni Inatsisartuniit ICC-miillu peqataasoqarpoq.
Nunap inuii nunarsuarmi tamaneersut katillugit 1200-nit amerlanerusut naalagaaffiit siuttui Naalagaaffiit Peqatigiinnilu atorfilittat sapaatip-akunnerini marlunni New Yorkimi ataatsimeeqatigissavaat. Nunap inuiisa atugaat pillugit Naalagaaffiit Peqatigiit isummersoqatigiiffik Permanent Forum tallimassaanik taamatut ataatsimiilerpoq.
Ullumikkullu ulloq ammaanersiornertut atorneqassaaq, taamaariarmallu inuppassuit ullormi siullermi najuunnerat nunanut allanut pisortaqarfimmi sulisup Marianne Lykke Thomsenip oqaatigaa.
Taanna Namminersornerullutik Oqartussaniit peqataatinneqarpoq. Inatsisartunilu ilaasortat arlallit aammattaaq peqataapput ilaatigut Inatsisartut nunanut allanut sillimaniarnermullu ataatsimiititaliamiit Johan Lund Olsen peqataavoq, Siumut sinnerlugu Tommy Marø peqataavoq aammattaaq Demokraatiniit Marie Fleischer peqataalluni. Taamatuttaaq nutserisut allatsillu aamma peqataasut oqaatigineqarpoq.
Taakku saniatigut ICC-miit sisamat peqataatinneqarput Aqqaluk Lynge siuttoralugu. Ataatsimiittaqattaarnerit saniatigut pisussat nunat inuiinut attuumassuteqartut arlallit immikkut takutinneqartassapput. Soorlu arnanut meeqqanullu tunngasut taamatuttaaq nunat immikkuullarissusaat malunnartinniarneqassallutik, assersuutigalugu sapaatip-akunnerata tulliani issittunut tunngassuteqartut Ruslandimullu tunngassuteqartut oqallisigineqassapput.
Tallimassaanik nunap inuii pillugit ataatsimiinneq tallimanngornermi maajip 26-iata tungaanut ingerlassaaq.