Permagreen aamma GA: Naalakkersuisut akisussaaffimmik tigusisariaqarput

Tassami sinerissap ilaani sanaartornissaq pillugu Naalakkersuisut aningaasaleereersimapput, sanaartornerilli aallartissimanagit, GA oqarpoq.

Nunatsinni sanaartornermik suliffeqarfiit annersaasa ilaata, Permagreenip immikkoortortaqarfimmini tallimani tamani suliassiissutit ikialiartupiloorneri malugisimavaa. Tassami Sisimiuni, Nuummi Kujataanilu ukiuni kingullerni sanaartorluarneq ingerlaannarniarpasinngilaq.

- Tassami tiimimusiaqartuummata soraarsittariaqarpagut, Permagreenimi pisortaq, Preben Kold Larsen, oqarpoq.

Taassuma sulisut 60-it aasariartorneranili soraarsittariaqarsimavai. Suliassat aappaagu 25 procentimik ikilissasut, sulifeqarfiata aamma natsorsuutigaa.

Nuup qeqqani illorsuup inissiaqarfiutigaluni inuussutissarsiortut inissaraluat, 100 millionit koruuninik sinnerlugit naleqartussaq saniarunnaarlugu ippassaq aalajangerpoq.

- Suut tamarmik piareeqqagaluarput aamma aningaasaliisussaqaraluarluni. Pilersaarut piareeqqavoq sanaartornissamullu akuersissuteqareerluta, Preben Kold Larsen, oqarpoq.

Nuummi Nunatsinnilu tamarmi qanoq ineriartortoqarnissaaanik politikkikkut nalunaarutit nutaat tusaareerlugit taanna aningaasaleeqataasunilu siunissamut nalornilerput.

Pisortaq taanna aningaasanut inatsisissatut siunnersuummi aningaasanik nutaanik takusassaqarsorinngilaq. Aamma sinerissap sinnerani.

Permagreenip pisortaa Sulisitsisut Peqatigiiffiata pisortaanit Brian Buus Pedersenimit tapersersorneqarpoq, taannami aamma utaqqisinnaajunnaarsimavoq.

- Naalakkersuisut akisussaaffimminnik tigusinngippata, sanaartugassatullu pilersaarutigineqartut piviusunngortinngippassuk ajornartorsiutit amerliartuinnassapput, Brian Buus Pedersen oqarpoq:

- Tamassuma inernerissavaa inuiaqatigiinnut ajornartorsiutit amerliartuinnarnerannik. Suliffissaaleqisut amerliartuinnassapput, ilinniartut ilinniakkaminnut atatillugu misileraaffissaat ikilissapput, naak suliffissaqartitsiniarnermut aningaasanik atuisoqarsimagaluartoq, soorlu aamma ilinniarfiit piorsarneqarsimagaluartut. Taakkuinnaanngillalli, aamma kommunit tamanna malugivaat, isumaginninnermut aningaasartuutaat amerliartuinnavillutik. Akileraarutitigut isertitat ikiliartuinnavipput, tassa kommuninit Namminersorlutillu Oqartussanit malugineqarluni, Brian Buus Pedersen oqarpoq.

Sanaartugassanut iluarsartuussinissamullu aningaasaateqarfik 1,5 milliardit koruuninik imaqartoq, GA-p Permagreenillu innersuussutigivaat. Aningaasat sanaartugassatut pilersaarutinut immikkoortinneqarsimasut millionilikkaat eqqaasitsissutigalugit, kisiannili atorneqanngitsut:

- Tamanna imminnut akerleriittutut oqaatigineqarsinnaavoq. Tassami sanaartugassanut inuiaqatigiinnut pisariaqartinneqaqisunut Inatsisartut aningaasaliinikuupput, aningaasalli atorneqaratik, Brian Buus Pedersen oqarpoq.

Permagreenimi sulisut 20-it allat ukiut naalernerani sorarsitaasinnaasut, taanna oqaluttuarpoq. Aamma sanaartortitsiviit allat eqqugaaqqapput. Assersuutigalugu Atcon sulisumi 100-juusut ilaat 30-it soraarsittariaqarsimavai.