Periuseq Afghanistanimi misilerarneqarsimasoq Kommune Kujallermi misilerarneqassaaq
Avatangiisinut Pinngortitamullu Naalakkersuisoq isumaqatigiissusiorfigineqarpoq:
- Maani Nunatsinni eqqagassat annertoqaat, aamma oqarsinnaavugut ukiuni kingullerni sumiginnagaapput, Avatangiisinut Pinngortitamullu Naalakkersuisoq Kim Kielsen, oqarpoq.
Kommunit ataasiakkaat eqqakkanik immikkoortitsisalernikuunerat, taassuma aamma eqqaavaa, tamannali naammannginnerarpaa, kommunimmi allat aamma immikkoortitsisalernissaat kissaatigigamiuk.
Kommuneq Kujallermi eqqagassalerinerup pitsaanerulersinneqarnissaa pillugu, Namminersorlutik Oqartussat, Kommune Kujallermilu borgmesteri Jørgen Wæver Johansen isumaqatigiissusioqqammerput.
Eqqagassat isumannaatsumik suliarineqartalerlutillu ikuallanneqarsinnaasarnissaat pillugu misileraasoqassalluni.
Politikkikkullu siunniussaq taanna innuttaasunit qanoq malugineqarsinnaanersoq, Jørgen Wæver Johansenimut apeqqutigaarput, akivorlu:
- Soorunami tigussaanerpaamik Nanortalimmi malugineqassaaq, tassani eqqaveqarnerup annertuumik pitsanngoriaateqarnissaa neriuutigaarput. Kisianni aamma taassuma saniatigut eqqaaveqarneq kommuni tamakkerlugu nutaamik pilersaarusiuunneqarnerata kingunerisaanik neriuutigaarput aamma eqqaaginnarneq pinnagu, kisiannili atoqqinneqarsinnaasunik immikkoortiterinerup, taakkulu avammut tunineqarnerisa kingunerisaannik eqqaavissuit illoqarfinniittut nunaqarfinniittullu taakkua torernerusumik siunissami isikkoqalerlutillu inissisimalernissaat taanna neriuutigaarput, Kommune Kujallermi borgmesteri Jørgen Wæver Johansen, oqarpoq.
Ikuallaavik aalajangersimasoq airburnerimik taaguutilik, Kommune Kujallermi maanna misilerarneqartussanngorpoq. Ikuallaavik taamaattoq Tasiilami maanna aamma misilerarneqaleruttorpoq. Ikuallaavik airburnerimik taaguutilik Afghanistanimi siullermik atorneqarpoq.
Teknikkikkullu periutsit aatsaat aaqqiivigineqareerpata, kommunit assersuutigalugu eqqagassalerisarnerannut tunngatillugu inatsisitigut piumasaqaateqarfigineqartalernissaat qiviarneqarsinnaasoq, Kim Kielsenip oqaatigaa:
- Inatsisit suut tunngavigalugit sulisoqarnersoq takoqqaartariaqarparput. Imaaliallaannarluta piumasaqaateqarsinnaanngilavut, misileraanerilli inerneri takoqqaartariaqarlutigit, Avatangiisinut Pinngortitamullu Naalakkersuisoq Kim Kielsen oqarpoq.
Eqqagassalerineq pillugu Kommune Kujalliup Namminersorlutillu Oqartussat akornanni isumaqatigiissut inatsisitigut pituttuinngilaq, eqqagassat passunneqarneranni asersuutigalgu kommuni sumiginnaassagaluarpat, oqartussanit akisussaatinneqarsinnaanani.