Periarfissanik atorluaanerulernissaq siunertaraat
Kalaallit Nunaat atortussaqarpoq. Taakkua maanna atorneqartariaqarput. Kompetencekompagniet tusagassiorfinnut nalunaarummini taama allappoq.
Ataatsimeersuarneq ulluni 21., 22. aamma 23. septembarimi Sarfarissoq II Kalaallit Nunaanni inuiaqatigiit ineriartorneranni killiffiussaaq pingaarutilik.
Ataatsimeersuarneq siullermik apriilimi pisussatut pilersaarusiorneqaraluarpoq kinguartinneqartariaqarsimallunili, Islandimi qaqqap innermit anitsineranit qullaatsitat pissutaallutik peqaataasussat Nuummut apuutinngitsoormata.
Innuttaasut teknologimut nutaamut soqutiginninnerisa paasissutissiisarnermi attaveqaqatiginnermilu teknologip (IKT) atorluarneqarnissaanut Kalaallit Nunaat periarfissippaat.
Immap naqqatigut kabelip nunarsuarmilu radiokkut attaveqaatit takinersaata atornerisigut suliassaqarfiit taakkua pingaarutilimmik ammaassivigineqarput, Kalaallit Nunaanni namminermi aammalu nunarsuarmioqatinut tunngatillugu.
Minnerunngitsumik ilinniartitaanermi IKT-p periarfissat nutaat ammaappai, tamannalu Sarfarissoq II suliassaqarfinni assigiinngitsuni paarlaasseqatigiinnerit allaaserisallu atorlugit nassuiaateqarfigissallugu.
