Periarfiissat nutaat aallunneqarlik
Nunani Avannarlerni siuttut pingaartippaat, Nunat Avannarliit avammut takutittariaqaraat, aningaasarsiornikkut ajornartorsiortoqaraluartoq nunarsuarmi silap pissusaata allanngoriartornera iliuuseqarfigineqarsinnaasoq, aningaasarsiornikkut ineriartortitsineq unitsinngikkaluarlugu.
- Nunat Avannarliit ataavartunik nukissiuuteqarnermik ineriartortitsinissaminnut periarfissaqarluarput, matumani naatitanik, erngup nukinganik, anorimit, nunap iluata kissassusianik nukissiuuteqarnermik ineriartortitsinissaq aamma nukimmik atorluaanerulernissaq pineqartut, ataatsimeersuaqataasut isumaqatigiissutigisaminni allapput.
- Nunatsinni erngup nukissiuuteqarnikkut periarfissarissaarnerput iluaqutigaarput. Taamaattumik nunat tamat, tamakkua pillugit oqallinneranni ersarissumik peqataanissarput pisariaqarpoq, taama oqarpoq naalakkersuisunut ilaasortaq Per Berthelsen, Sulisitsisut Peqatigiiffiata pisortaa Henrik Leth peqatigalugu nunarput sinnerlugu ataatsimeersuarnermi peqataasoq.