Peqqutaasoq paasineqarpoq

Qulimiguullip tunuatungaani aquummut kaavittumut kaavitititsisoq (drivaksel) napisimasoq paasineqarpoq. Kisianni sooq napisimanersoq suli paasineqanngilaq. Atuagassiami Ingeniørenimi tamanna allaaserineqarpoq.

"Ajutoorsimasoqartillugu paasiniaasartut naliliinerigallarpaat", sakkutuut naalagaat, Henrik Røboe Dam, Danmarkimi sakkutuunut timmisartortartunut pisortaq, oqarpoq.

Qulimiguulik Hvidbjørnimut Kangilinnguani taleqqasumut mikkiartortillugu nakkarpoq, umiarsuarmiit 25 meterisut ungasitsigisumut mittariaqalerami, inunnilli ajoqusertoqanngilaq.

Ingeniørenimi allaatigineqartut naapertorlugit, kaavititsisup drivakselip napisimanera sumik pissuteqarsimanersoq Illersornissamut Qullersaqarfiup Ajutoortoqartillugu Paasiniaasartuisa maanna paaasiniaqqissaalerpaat. Tamanna pissaaq qulimiguulimmik sanaartorsimasut, Augusta/Westland peqatigalugit, Henrik Røboe Dam ilisimatitsivoq.

"Suna ajutoornermut pissutaanersoq pillugu eqqoriaanerit arlaqarput, kisiannili eqqortoq uagut pigiinnarallassavarput. Qulimiguullimmi Lynx-imik taaguteqartup motooriata sannaa allanit allaanerummat, pissutasut arlaqarsinnaapput".

Ajutoornermut sunarpiaq pissutaasimanersoq suli paasineqanngilaq, paasineqarnissaanullu piffissaq sivisungaatsiartoq ingerlasinnaavoq.