Peqquserluttoqartarnersoq paasiniarneqarpoq

Kalaallit Nunaannut biilinik eqqussinermi akitsuutit aqqutigalugit aningaasanik peqquserluttoqartarsimanersoq paasiniarlugu, bagmandspolitiit misissuinerat sapaatip-akunnerata tulliani nanginneqaqqissaaq.

Biilit akisuut pineqarput, ukiunilu kingullerni arlaqalersuni biilit taamaattut nunatsinnut eqqunneqartarput.

Biilit nunatsinnut eqqussuunneqartut tamarmik akitsuuserneqartarput, akitsuusiinermilu apeqqutaatinneqartarluni biilip pisiarineqarnerani nalinga.

Akitsuutinik peqquserluttoqartarsimanissaanik pasitsaassineq, Amerikami avannarlermiit Canadamiillu biilit eqqussuunneqartarnerini, assartuinermi akigitinneqartartut misissornerini aallartippoq.

Akitsuutinut akiliinikinerunissaq anguniarlugu, biilit akiviinut taarsiullugit, assartuinermut nuunneqartarsimanissaat, pasitsaatigineqartunut ilaavoq, taamaammallu bagmandspolitiinit misissuiffigineqalerpoq.

Peqquserluttoqartarsimassappat, nunatta karsia koruuninik millionilikkaanik annaasaqarsimasinnaavoq.

Biilit Amerika avannarlermiit Canadamiillu Nuummut eqqunneqartut siorna 50-iupput.

Aningaasanik pinerluttoqarsimaneranik misissuitinneqartartut, bagmandspolitiinik taaneqartartut, maajip qaammataani misissuinertik aallarnerpaat, maannakkullu misissuineq nangillugu sapaatip-akunnerani tullermi, bagmandspolitiit, misissuiartorlutik nunatsinnut tikeqqissapput.

Biilit Nuummut siorna eqqussorneqarsimasut kisiisa eqqaassagaanni, nunatta karsiata isertitai 4 millioni koruunit missaanniipput.