Peqquserlullutik taasisarsimasut Ruth Heilmannip ulluni arlalinni ilisimasimavaa
Inatsisartoqarfimmi inuit arlallit radioavisimut oqarput inatsisartut peqquserlullutik taasisimasut aqqi pingasut immaqaluunniit sisamat Inatsisartut siulittaasoqarfianut anngunneqareersimasut. Innuttaasut isummersortut aalassassimaarutigaat – sualummik KNR-ip oqallittarfiani – inatsisartut siulittaasuata Ruth Heilmannip qangali iliuuseqarsimannginnera, siulittaasoqarfiup pisoq sapaatip-akunnerisa marluk matuma siornali tusareermagu. Naalakkersuisut siulittaasuata Hans Enoksenip, Atassutillu siulittaasuata Finn Karlsenip radioaviisimi oqaaseqarlutik piumasarereerpaat misissuisoqassasoq. Aamma taama piumasaqarpoq partiip Siumup politikkikkut oqaaseqartartua Lars-Emil Johansen aamma inatsisartut siulittaasorisimasaat, inatsisartunut ilaasortaq Jonathan Motzfeldt.
Folketingip siulittaasoqarfiani ilaasortaq Helge Adam Møller radioaviisimut ippassaq oqarpoq uukapaatitsiniarnerussasoq allaallu peqquserluttuliornerussasoq Folketingimi ilaasortap arlaata alla ataatsimiittarfimmi najuutinngitsoq taasissussimappagu.
Inatsisartut siulittaasuata uppernarsarpaa inatsisartuni taasissussisarsimaneraanerit sukumiisumik misissorneqartut. Oqaaseqarumanngilarli taamaallaallu erseqqissaassutigalugu siulittaasoqarfiup ataatsimiinneri matoqqasumik ingerlanneqartartut.
– Neriuppugulli sapaatip-akunnerata tulliani paasisaqarnerusimassalluta, Ruth Heilmann oqarpoq.
Inatsisartuni ilaasortat arlallit radioaviisimut uppernarsarpaat paasissutissinneqarnissartik utaqqikatalluinnaritsik aamma pissutissaqanngitsumik pisuutinneqartaleramik issiavimminnut nippusimaniaannartutut.
