Peqquserlullutik aningaasaliortut tigusarineqarput
Peqquserlulluni aningaasaliat kioskimi imerniartarfiillu ilaanni sapaatip akunnerani kingullermi akiliutitut atorneqarsimapput.
Angut inuusuttoq politiinit tigusarineqarpoq angullu inuusuttoq alla kingorna aamma tigusarineqarluni, taassumallu angerlarsimaffiani politiit misissuineranni peqquserlulluni aningaasaliat marluk nassaarineqarput.
Angutit inuusuttut marluk politiinit tigusarineqarnerisa kingorna angutit allat marluk aamma tigusarineqarput.
Angutit inuusuttut sisamat politiinit killisiorneqarnerisa kingorna iperagaapput, taamaattorli peqquserlullutik aningaasaliorsimasutut pasineqarlutik.
Peqquserlulluni aningaasaliorsimaneq politiinit suli misissuiffigineqarpoq, sulilu naammassineqarani, Ilulissani politiit pisortaat Janus Eigaard oqarpoq, erseqqissarlugulu angutit sisamat taakkua eqqartuussivimmut sassartinneqarumaartut.
Angutit sisamat qanoq iliorlutik peqquserlullutik aningaasaliorsimanersut politiinit oqaatigiumaneqanngilaq.
Angutit pasineqartut inuusunnersaat 19-inik ukioqarpoq sinnerilu pingasut 20-t missaannik ukioqarlutik.
