Sapaatip akunnera qaangiuppoq politimestereqarfiup Gorm Kjeldsen Jørgen Wæver Johansenilu qinnuigimmagit inatsisit sanioqqullugit aalisarneq pillugu nalunaarutip isertuussap immikkuualuttortaanik tuneqquluni.
Politimester Anders Linnet ullumi oqarpoq angutit pineqartut nassuiaataannik suli tigusaqarani.
Taamaattoq Jørgen Wæver Johansen radioaviisimut oqarpoq naatsorsuutigigini sapaatip akunnerani matumani nassuiaasiorsinnaassalluni.
Gorm Kjeldsen sapaatip akunnera qaangiuppoq Jørgen Wæver Johansenimut saaffiginnimmat nalunaarusiaq isertugaq politiinut suli tunniunnagu. Taamaammat politiit naalakkersuisunut ilaasortaasimasoq Jørgen Wæver Johansen qinnuigisimavaat pineqartumi immikkuualuttut nassuiaateqarfigeqqullugit.
Jørgen Wæver Johansenip aamma naalakkersuisuunermi nalaani oqaatigineqartumik nalunaarusiornissaq suliniutigisimavaa, nalunaarummilu tassani qulaajarneqartunut ilaapput assersutigalugit aalisakkat oqimaassusiinik eqqunngitsumik nalunaarsuisaneq, pisassiissutit pissusissamisuunngitsumik passunneqartarnerat aamma raajanut akitsuutip eqqunngitsumik naatsorsorneqartarnera.