Peqqissuunissaq inuusuttunut oqaluuseritinniarneqarpoq

Naalakkersuisunut ilaasortap Asii Chemnitz Narupip Nuummi inuusuttuaqqat unnugu arfineq-pingasunut naapinniarpai, peqqissuuneq oqaloqatigiissutiginiarlugu. Taamatut naapitsinissap siunertaraam inuusuttut peqqissumik inuuneqalernissamik toqqaasinnaanngortinnissaat. Peqqissumilli inuuneqarneq inuusuttut qanoq isumaqartippaat, Nuummi inuusuttut aqqusinermi neriniartarfimmilu naapitagut peqqissuuneq pillugu isummersorpavut.

- Pujortarneq ajorpunga imernerlu ajorlunga aamma naartoqqammerama sodavanditorunnaarnikuuvunga. Ane Marie Gjærulff 18-inik ukiulik oqarpoq.

- Peqqinnartunik nerisarpunga peqqinniassagama, soorlu naatitat kalaalimerngillu nerisarilluarpakka. Karla 15-inik ukiulik oqarpoq.

- Qinikkat peqqissuunissap anguniarneqarnissaanut oqaaseqarsimassappata suna pisimassaneraat naluara, malinnaaviginnginnakkit. Kisianni qanoq iliornissannik naalakkerneqartariaqanngilanga. Aamma qinikkat imminnut pivallaarnatik inuusuttuaqqat samminerusariaqaraluarpaat, imerpallaat meeqqallu unnuaannakkut angalaaginnartut nakkutiginerusariaqalerpaat. Nancy Jeremiassen oqarpoq.