Peqqissuunissaq imminullu illersorsinnaanissaq sapaatiuppat sammineqassapput
Nuummi innuttaasut 15-ileereersimasut aggustip aqqarnani nal. 12.00-mit akunnerni pingasuni imminut illersornissamik, timersorluni unammissutinik takutitsinernillu misiliisinnaapput. Kyushomik Timersoqatigiiffik aaqqissuisuuvoq, aaqqissuusinerlu atuarfimmi USK-imi ingerlanneqassaaq.
Allattoq Peter Troelsen, Simon Uldum
aggustip 07-at 2013 05:19
Timersoqatigiiffiup timersorluni unammissutinik ilitsersuisartut nunarsuarmik pikkorinnersaata sapaatiuppat sungiusartitsinissaa iluatsissimavaa, peqataaniartullu taamaalillutik pitsaalluinnartumik ilitsersorneqassapput. Tassaavorlu Karsten Dam angusarisarsimasaalu pitsaalluinnarpoq. Karsten Dam ilaatigut Pernambuko Karatemi Kyusho Aiji Jutsumi 5 daniuvoq ilitsersuisartutullu nunarsuaq tamakkerlugu tusaamasaalluni.
Sungiusaaneq qulequteqarpoq "Tanngai - peqqissuuneq imminut illersorneruvoq" ilitsersuisartumillu tikeraartoqarnerup saniatigut aamma Jane Lyngvig Kyushortartorlu nuummeersoq Søren Thestrup ilitsersuissapput. Peqataaneq akeqanngilaq, aaqqissuussineq Helene aamma Svend Jungep Aningaasaateqarfiannit aningaasaliiffigineqarsimammat.
