Peqqissutsimut pitsaaliunermullu aqutsisoqarfik pisortartaartoq
Peter Henriksen Peqqissutsimut Pitsaaliunermullu Aqutsisoqarfimmi decembarip aallaqqaaniit pisortanngussaaq. Atorfik Jóanis Erik Køtlumimit atorfigineqarsimavoq, maannalu Savalimmiunut angerlarniarluni aalajangersimalluni. Namminersorlutik Oqartussat tusagassiutinut nalunaaruteqarlutik allapput.
58-inik ukiulik Peter Henriksen Danmarkimi napparsimmavimmi namminersortumi Filadelfiami atorfillit pisortaatut atorfeqarsimavoq. Namminersornerullutik Oqartussaqarallarmat pisunik ilisimasaqarpoq Dronning Ingridiullu Napparsimmaviani ilinniartitsisarsimalluni.
Maannalu pisortaasoq aallartussanngorpoq, Peqqissutsimullu Naalakkersuisoqarfimmi pisortap Lone Nukaaraq Møllerip Jóanis Erik Køtlum nersualaarlugu inuulluaqquaa:
- Maanna Jóanis Erik Køtlum novembarip naanerani soraartussanngortoq inuulluaqqusussanngorparput. Ukiuni kingullerni arlaqartuni Jóanis Erik Peqqissutsimut Pitsaaliunermullu Aqutsisoqarfimmi pitsaanerpaamik siuttuusimavoq minnerunngitsumik peqqinnissaqarfiup allanngortiteriffigineqarnerata nalaani, Peqqissutsimut naalakkersuisoqarfimmi pisortaq allappoq.
