Peqqissutsimut Pisortaqarfik GIF-ilu suleqatigiilersut
Peqqissutsimut naalakkersuisoq Agathe Fontain aamma Kalaallit Nunaanni Timersoqatigiit Kattuffianni (GIF) siulittaasup tullia Finn Meinel suleqatigiinnissamik atsioqatigiipput. Isumaqatigiissut ilaatigut timersoqatigiiffinni meeqqanut inuusuttunullu suliniutinik imaqassaaq, isumaqatigiissutillu malitsigisaanik aamma Nunatsinni timersornikkut aaqqissuussinerni angisuuni peqqinnissaq pillugu paasititsiniaasoqartassalluni.
- GIF-ip Peqqissutsimullu naalakkersuisoqarfiup akornanni suleqatigiinnissamik isumaqatigiissut peqqinnissamik siuarsaanermik innuttaasullu peqqissusaannut iluaqutaasussamik pitsaaliuinermik suliaqarnerup qaffassarneqarnissaanik illuatungeriit kissaateqarnerannik ersersitsivoq. GIF peqatigiiffippaalunnik meeqqat inuusuttullu pillugit suliniuteqartunik tunuliaqutaqarpoq. Taamaammat peqqissumik inuuneqarnissaq pillugu paasissutissanik inuusuttunut tunniussaqarnissarput tulluarpoq, peqqissutsimut naalakkersuisoq, Agathe Fontain, nassuiaavoq.
Peqqissutsimut naalakkersuisoqarfiup GIF-illu ilaatigut aanngaajaarniutit, pujortartarneq nerisaqarnerlu pillugit anguniagassanik timersoqatigiiffini tamani atorneqarsinnaasunik inerisaaneq, meeqqat inuusuttullu imigassartornerisa hashimillu pujortartarnerisa pinaveersaartinnissaat, innuttaasullu timersornissamut kaammattuutinik atuuttunik naammassisaqarnissaannut periarfissaannik pitsanngorsaanissaq suleqatigiissutiginiarpaat.
-Namminersorlutik Oqartussat sinnerlugit Peqqissutsimut Naalakkersuisoqarfiup peqqinnanngitsunik nerisaqarnerup annikillisarneqarnissaa pillugu, atornerluinermik ajornartorsiutit anigorniarnissaat, inooriaatsimillu patsiseqartumik nappaatit pinngitsoortinnissaat pillugit GIF-imik suleqateqarusunnerat nuannaarutissaavoq. GIF-ip Namminersorlutik Oqartussat suleqatitut pingaarutilittut isigaa, tamattalu peqqissuunissarput anguniarlugu isumaqatigiissutip qanittumik angusaqarfiusumillu suleqatigiinnissamut periarfissiinissaa neriuutigalugu, GIF-imi siulittaasup tullia Finn Meinel oqarpoq.
