Peqqissutsimut naalakkersuisut suleqatigiinnerusariaqarput

-Maannut vikarbureaut aqqutigalugit taartaagallartunik pissarsiniartarnermut tunngatillugu ajorsartussat tassaapput taakkua nunat avannarliit tamarmik, minnerunngitsumik napparsimasut katsorsarneqartariaqartut. Aamma nunanut avannarlernut sanilliulluta uagut aningaasaateqarnerpaajunngilagut. Taamaattumik isumaqarpunga suleqatigiittoqartariaqartoq. Tassami inuit tamatta eqqartorpavut, Danmarkimiikkaluarutta Norgemiikkaluarutta Sverigemiikkaluaruttaluunniit. Taamaattumik isumaqarpunga nunani avannarlerni peqqinnissaqarfinni naalakkersuisut arlaatigut ataqatigiissaarisinnaasariaqartut, tassami akisuneqqusaalluta pilissagaluarutta, soorlumi massakkut aamma taama iliortoqartoq, peqqissaasut nalunaarput annertunerusumik aningaasarsiaqarunik taava peqqissasut amerlanerusut maanga tikissasut. Norgemi aamma taama oqassapput, Sverigemi aamma taamatut oqassapput. Qaffanneqqusaalluta inississagutta assersuutigalugu peqqissaasut nakorsallu pissarsiariniarlugit, qularutiginngilara uagut ajorsartuussasugut, taamaattumik isumaqarpunga nunani avannarlerni peqqissutsimut naalakkersuisut ataqatigiissaarisinnaasumik suliaqartariaqarput, Jess G. Berthelsen oqarpoq, nangillunilu:

-Peqqinnissaqarfik ataatsimut isigigutsigu, maannakkut ajornartorsiutit nooqattaaginnarpagut nunaminngaanniit nunamut, soorlu assersuutigalugu Norgemi qaffaasoqarniarpat taava peqqissaasorpassuit Norgemukassapput, taava ajornartorsiut Sverigemiilissaaq Danmarkimiilissaaq aammalu nunatsinniilissaaq. Taamaattumi arlaatigut pinngitsoorani taakkunani nunani avannarlerni naalakkersuisut aaqqiiniartariaqarput arlaatigut ataqatigiissaarillutik, SIK-p siulittaasua Jess G. Berthelsen oqarpoq.

Nunatsinni peqqissutsimut naalakkersuisup Ark'alo Abelsenip Islandimi peqqissutsimut naalakkersuisoq sapaatiuppat ataatsimeeqatigisussaangaluarpaa, nunatsinnili peqqinnissaqarfimmi aningaasatigut ajornartorsiorneq pissutigalugu ullumikkut nunatsinnut angerlarpoq.