Peqqissutsimut Naalakkersuisoq: Juullilerpoq coronamut mianersorta
- Juullit nalaani inuit juullisioriarniarlutik tikerartarput. Taavalu nunatta iluani ilaquttaminnut nalunngisaminnut juullisiorniarlutik tikeraarrattarput, tuniluunneq pakkersimaarniarlugu taamatut killilersuutinik nakorsaaneqarfimmiit siunnersorneqarnerput aallaavigalugu taamatut killilersuinikuuvugut, Peqqinnissamut naalakkersuisoq, Kirsten Fencker, oqarpoq.
Killilersuutit ilagaat kikkut tamarmik isersimaffigisinnaasaanni qanermut assiaquteqartarnissaq. Tamannalu aappaagu martsip arferngata tungaanut sivitsorneqarpoq.
AAMMA ATUARUK Angalasunut corona pillugu maleruagassat nutaat: Misissortinneq sivisunerpaamik akunnernik 48-nik pisoqaassuseqassasoq
Nunarput tamakkerlugu coronamik tunillanneqarsimasutut nalunaarsorneqarsimasut ullumikkut 212-upput. Nappaalli illoqarfinni nunaqarfinnilu siaruaassimanerulerluni.
Danmarkimi nunatsinnut timmisartuussinerit decembarip ulluisa arfernanni marsip ulluisa arfernannut atuutissapput:
- Kalaallit Nunaannut timmisartumut ilaasut, marlunnik ukioqalereersimasut tamarmik PCR-imik misissortinnerminni, sivisunerpaamik nal. ak. 48-nik pisoqaassuseqartumi tunillatsissimannginnertik uppernarsarsinnaassavaat. Piffissamili decembarip arfernani arfineq aappaanilu tunillatsissimannginnermut uppernarsaat nal. ak. 72-inik pisoqaassuseqarsinnaavoq.
- Ilaasut 12-inik ukioqalereersimasut, Kalaallit Nunaanni najugaqanngitsut aamma tamakkiisumik akiuussutissinneqasimanertik uppernarsarsinnaassavaat.
- Ilaasut sapaatit akunneratailuani tunillatsissimasumik qanillisaqarsimasut, tunillatsissimasumik qanillisaqarnerminniit ullut sisamat qaangiunnerini PCR-imik misissortinnerminnik takutitsisinnaassapput, tamatumalu kingorna ullut marluk qaangiunnerini misissorteqqissallutik.
- Massakkut tuniluunneq ingerlaarpoq unitsitassaajunnaareerluni nakorsaanerup oqarneratut. Taava minnerpaaffissaaniitinniarlugu taamatut sivisuumik killilersuigallarpugut, Kirsten Fencker oqarpoq.
Meeqqat marluniit aqqaneq marluk tikillugit ukiullit cafénut, atuakkanik atorniartarfunnut, neriniartarfinnut, naluttarfinnut assigisaannullu iserniarunik covid-19-imik tunillanneqarsimanermik uppernarsaateqaqqaartariaqarput, meeqqanut killilersuut taanna sapaatit akunnerni marlunnik atuutereerluni atorunnaaqqippoq.
Killilersuutit paasiuminaatsut
Killilersuutillu taakku angajoqqaanit paatsuungassutigineqarnerat meeqqat illersuisuannit, Aviaja Egede Lyngemit isornartorsiorneqarput. Oqartussat paasissutissiinerat ersarinnerusinnaagaluartoq taamnna isumaqarpoq.
Angajoqqaat paatsuungasimanerat Kirsten Fenckerimit maluginiarneqarlunilu paasilluarneqarsinnaavoq. Taamaammallu paasissutissanik paasiuminarsaanissartik KNR-imut oqaatigaa.
- Assilianngorlugit grafikkitalerlugit massakkut suliaraagut, naatsorsuutigaara ulluni qaninnerni killilersuutit suut kikkunnut atuunnersut paasinarsarlugit piariissasut, Peqqinnissamut naalakkersuisoq, Kirsten Fencker KNR-imut oqarpoq.
AAMMA ATUARUK Meeqqat illersuisuata corona malittarisassat paasissutissartaat ersarissut amigaatigigai
Nunatta ammaakkiartoqqilernissaanut pilersaarusiaq septembarip pingajuaneersoq suli atuuppoq.