Peqqissutsimut ministeri Naalakkersuisut attavigissavaat
Danskilli peqqinnissamut ministeriat akuersaarnissamut pisussaanngitsoq, Agathe Fontainip nassuerutigaa.
- Kalaallit tamatut akileeqqaarlutik nutserunneqartalernissaat ippinnartutut isigigipput, Berthel Haarderimut saaffiginnissutigikutsoorsinaavarput, Agathe Fontain (IA) oqarpoq.
Danmarkimi peqqinnissaq pillugu inatsit allanngormat, nakorsiat oqalutsimik pisariaqartitsigunik, juunip aallaqqaataaniit oqalutsimut nammineq akiliisalissapput.
Kalallit Danmarkimi ukiut arfineq marluk sinnerlugit najugaqareersimasut tamatuminnga aamma eqqugaasssapput.
Peqqinnissamulli naalakkersuisup nassuerutigaa, saaffiginnissutissani danskit peqqinnissamut ministeriata tusaanngitsuusaassallugu aalajangersinnaasoq:
- Neriuinnarsinnaavunga, qallunaat naalakkersuisui qanoq iliornissaannik soorunami uagut peqqusinnaannginnatsigit, Agathe Fontain oqarpoq.
Niels Thomsen (D) danskit ministeriannut ammasunik februaarip 21-ani allagaqarpoq, tikkuarlugu, kalaallit naalagaaffeqatigiinnut ilaanermikkut, nunani avanni innuttaasutut allatut pineqartariaqartut.
Naak aamma naalagaaffimmi innuttaaqataagaluarlutik, kalaallit qallunaanit ajornerusumik atugaqalissasut, Folketinngimut ilaasortaq IA-meersoq Juliane Henningsen februaarip 21-ani tikkuaavoq.
Tassalu Agathe Fontain neriuppoq, Folketingimi ilaasortat Nunatsinnilu Naalakkersuisut ilungersoqatigiippata iluaqutaassasoq.
- Folketingimi ilasortavut saaffiginnippata uagullu Naalakkersuisuniit aamma saaffiginnilluta, neriuppunga eqqarsalersitseqqikkumaartoq, ilumut taamatut aalajangersimanertik allanngortissinnaannginnerlugu, peqqinnissamut naalakkersuisoq oqarpoq.
Siumulli siulittaasua Aleqa Hammond isumaqarpoq, tamanna naammanngitsoq.
- Neriuppunga naalakkersuisut siulittaasuata statsministerillu akunnerminni naalagaaffeqatigiinnerup iluani pissutsit pillugit ukiumoortumik ataatsimiilerunik qaqissagaa, naalagaaffeqatigiinnerup iluani pisussaaffittut isigigakku, Aleqa Hammond oqarpoq.
Nunatsinni Savalimmiunilu Naalakkersuisuisut siulittaasuisa danskillu statsiministeriisa ukiumoortumik naapinnissaat aasaru junimi pissangatinneqarpoq.
Kalaallit nunatsinniit Danmarkimut nakorsiartut nutserisoqarnermut akiliisassanngillat, Namminersorlutik Oqartussat nutserisoqarnikkut suli isumaginnimmata.
