Peqqissutsimut ministeri: Danskeq Belgiami uninngasoq coronavirusimik tunillatsissimanngilaq
Danskisut innuttaassusilik Belgiami napparsimmavimmi uninngasoq, coronavirusimik tunillanneqarsimanngilaq. Tunillanneqarsimasinnaanera aarleqqutigineqaraluarpoq. Danmarkip peqqisssutsimut ministeria Magnus Heunicke Twitterikkut taama ilisimatitsivoq.
- Qallunaatut innuttaassusillip Belgiami napparsimmavimmi uninngasoq coronavirusimik tunillanneqarsimasinnaasutut takussutissaqarmat misissorneqarpoq, coronavirusimilli tunillanneqarsimanngitsoq paasinarsivoq, Heunicke, Twitterikkut allappoq.
AAMMA ATUARUK Qallunaat marluk Hubeimit tikittut aneqqusaajunnaartut
Qallunaatut innuttaassusilik Kinamit angerlariartulerluni coronavirusimik tunillanneqarsimasinnaasutut takussutissaqarmat Belgiami napparsimmavimmut unitsinneqaraluarpoq.
Nualluummilli coronavirusimik tunillanneqarsimanngitsoq paasinarsimmat, qallunaatut innuttaassusilimmik tunillanneqarsimasumik suli siumuisoqanngilaq.
Inuit nualluummik coronavirusimik tunillanneqarsimasut nunarsuaq tamakkerlugu 17.000-init amerlanerupput. Immikkut ilisimasallit USA-mi Baltimoremi Johns Hopkins Universitymeersut nalunaarsugaanni tamanna atuarneqarsinnaavoq.
17.000-init amerlanerusut akornanni 414-it nualluut toqqutigisimavaat, tamangajalluinnarmik Kinami, ataaseq nualluummit Filippinerini toqquteqarsimavoq.
