Peqqissutsimut ataatsimiititaliaq iliuuseqaqqusissamaarpoq
Inatsisartut Peqqissutsimut Ataatsimiititaliaat Dronning Ingridip napparsimmaviani ajornartorsiutit pillugit kingusinnerpaamik ippassaq akineqareersimasussaagaluarpoq:
- Suli ulloq manna tikillugu oqaatsimik ataasinnguamilluunniit akineqanngilagut, taamaattumik naalakkersuisoq taanna akisussaasoq nunanut allanut angalaqattaaginnarani maanga nunatsinnut angerlarluni suliassani paarisariaqalerpai, Johan Lund Olsen kaammattuivoq.
Dronning Ingridip Napparsimmaviani “Sana”-mi peqqissaasut nakorsallu ernumapput, allaat napparsimmaviup matusariaqalernissaa ernummatigalugu.
Qanoq-una iliortoqartariaqartoq?
- Aningaasat aporfiuppata taava kaammattuutigisariaqarpoq naalakkersuisoq aningaasaqarnermut ataatsimiititaliamut aningaasanik qinnuteqassasoq, Johan Lund Olsen akivoq.
Ajornartorsiut ikinnerpaamik ukiuni qulini tusarneqartuartoq alliartuinnavissimavoq, sunaana allanngortittariaqartoq? Apereqqipparput.
- Tassa allanngortinneqartariaqarpoq. Peqqissutsimut ataatsimiititaliami eqqartortarparput Skandinaviap, nunat avannarliit avataani sulisussarsiornissaq – nakorsaasinnaapput peqqissaasuusinnaallutillu, oqarpoq nangillunilu.
- Skandinaviami peqqissaasunik amigaateqarnerujorujussuuaq atuuppoq, taamaattumik nunanut allanut ikiortissarsiorluta qiviartariaqarpugut. Assersuutigiinnarlugu Cubami peqqinnissamik aaqqissuussineq nunarsuarmi pitsaasuusoq aammalu amigaateqanngitsut ilisimaneqarpoq. Taamaammat peqqissaasut nakorsallu Cubameersut nunatsinni aamma atorluarneqakutsoorsinnaassapput, Johan Lund Olsen oqarpoq.
Inatsisartut Peqqissutsimut Ataatsimiititaliaani ilaasortaq Johan Lund Olsen, IA-meersoq taama oqarpoq. Peqqissutsimut Ataatsimiititaliami siulittaasoq Vittus Mikaelsen, Siumumeersoq oqaaseqartinniaraluaratsigu iluatsinngilarput, kisianni siusinnerusukkut ilisimatitsivoq ullup ilaagut peqqissutsimut ataatsimiititaliaqatini tamaasa Godmand Rasmussen, Atassut, Aleqa Hammond, Siumut, Juliane Henningsen Johan Lund Olsenilu, IA, Sanami ajornartorsiutit pillugit oqarasuaatikkut ataatsimeeqatigissallugit.
