Peqqissuserput misissorlugu aallarteqqipput
Pualavallaarpit? Pujortartarpit? Aappit naqitsinera qanoq ippa? Apeqqutit ilaatigut taama nipillit issittormiuusugut peqqissuserput pillugu misissuinissami apeqqutigineqassapput. Misissuinissami apeqquterpassuit Nuummiunut 1111-nut maanna nassiunneqareerput. Misissuinerlu sinerissami aamma ingerlanneqassaaq. Naalagaaffiup peqqissutsimik ilisimatusarfiani professori Peter Bjerregaard oqarpoq misissuineq peqqissutsimik suliniuteqarnermut atorneqassasoq:
- Misissuinermi paasisat peqqissuseq pillugu suliniuteqarnissamut iluaqutaanissamik saniatigut uummalluuteqartarneq sukkornerlu pillugu tunngaviusumik ilisimasanut atorneqassapput. Kalaallit immikkut ittutut taasariaqarput, nerisaat eqqarsaatigissagaanni, tassa nerisat peqqissutsimut qanoq sunniuteqarnerat misissorneqassaaq.
Nunatsinni misissuinermut siulianut naleqqiullutik pujortartartut ikinnerulersimanissaat Peter Bjerregaardip neriuutiginerarpaa. Illoqarfinnilumi tikitaminni pujortartukinnerulersimanera maluginiarsimanerarpaa.
Pujortartartut ikinnerulersimanissaat neriunaraluartoq pualavallaartut amerlanerulersimasorinartut Bjerregaard oqarpoq.
Nunarput tamakkerlugu misissuisoqassaaq nunarpullu isorartugaluartoq, innuttaasut peqqissutsimikkut assigiiginnapajaartumik atugaqarnissaat ilimagineqartoq, taamaattorli inuiaqatigiinni inissisimaneq pissutigalugu inuttut atukkatigut assigiinngitsoqarnissaa ilimanartoq, Peter Bjerregaard oqarpoq.
Issittumi nunallit peqqissusiat pillugu misissuineq siulleq nunatsinni 1993-imi pivoq. Misissuinerit siorna nanginneqarput, nunatsinni Nunavummi Alaskamilu ingerlanneqarlutik. Misissuineq ilaatigut Karen Elise Jensenip aningaasaateqarfianit, Nuna Fondemit, naalagaaffimit Namminersornerullutillu Oqartussanit aningaasaliiffigineqarpoq.
