Peqqissaasut qimarratissapput
Peqqissaasut amigaatigineqarnerujussuisa kinguneranik suliaritittussaagaluit ukioq ataaseq utaqqereersut, suli sivisunerusumik anniaateqarlutik utaqqeqqittussanngorput.
Pissutsit taamaannerat isoralugu maanna Peqqissaasut Kattuffiat akuliuppoq. Siulittaasuat Karin Holler ernumaqisoq oqarpoq, sulinermi pissutsit ajorluinnarnerisa kingunerisaannik peqqissaasut qimarratilernissaat annilaanngatigigini.
Peqqissaasut maaniittut ulapittorujussuupput, vagteqarfimmillu saniatigut freerfimminni aamma vagtiusariaqartarput, Peqqissaasut Kattuffiata siulittaasua Karin Holler nassuiaavoq.
Sanami peqqissaasut atorfeqavissut kisimik suliassat naammassisinnaanngimmatigik piffissami sivitsortumi Danmarkimiit taartaasussanik vikarburea-miit tikisitsisoqartartaraluartoq, taakku nalunaarput taartaasussanik pissarsisoqaqqissinnaanngitsoq.
Peqqissaasut maani atorfeqavissut ulapeqisut suli sulerulunnerulissapput, oqaannaarsinnaavugut pissutsit qaangeruminaatsut maanna atulerpagut, Kalaallit Nunaannimi Danmarkimilu kiisalu nunani avannarlerni peqqissaasut amigaatigineqarput. Pissutsit taamaannerisa peqqissaasut qimarratilernissaannik kinguneqarataannaavoq, Peqqissaasut Kattuffiata siulittaasua Karin Holler ernumaqisoq oqarpoq.
Peqqissaasut Kattuffiata siulittaasuata Sanami pissutsit taamaannerisigut sulisussanik nunatsinnukartitsiniarnissaq ajornakusuussangatippaa Danmarkimi peqqissaasut akissarsiaat nunatsinnut naleqqiullugit annikinnerummata, ineqartitsinerit meeqqerivinnilu inissartitsinerit ajornartorsiutaasarmata.
Nunatsinni peqqissaasut suliffimminnik qimatsinissaat pissanngippat pissutsillu ajoreersut ajornerulissanngippata, Karin Holler isumaqarpoq ajornartorsiut qaangerniarlugu politikkikkut
maannangaaq iliuuseqartoqartariaqartoq.
Politikeri pisortallu suliffeqarfiineersut allallu kattuffinneersut ingillutik pissutsit qanoq inneri takuniarlugit misissortariaqalerpaat peqqissaasulli atorfissaqartinneqartut pillugit isumaqatiginninniarlutik, Peqqissaasut Kattuffiata siulittaasua Karin Holler ernumaqisoq oqarpoq.
