Peqqissaasut paarlattaasartut amerlavallaaqaat
Peqqissaasunik paarlattaasartunik atuinerup minnerulernissaa apriilimi isumaqatigiissuteqarnikkut anguniarneqaraluarpoq, tamannali iluatsippallaarsimanngilaq. Tusagassiuutinut nalunaarummi oqaatigineqarpoq Dronning Ingridip napparsimmavissuani peqqissaasunik paarlattaasartunik atuineq peruluttunut immikkoortortaqarfimmi aallartissimasoq, tamatumalu kingorna immikkoortaqarfinnut allanut siaruaassimasoq.
Peqqissaasut Kattuffiannit pissusissamisuunngitsutut isigineqarpoq, peqqissaasorpassuit piffissami sivikitsumi Dronning Ingridip napparsimmavissuanut suliartortarmata, aalajangersimasumik atorfillit suliarisartagaasa affaannaannik suliaqartarlutik, marloriaammillu akissarsiaqartinneqarlutik.
Peqqissaasut danskit aalajangersimasumik atorfinitsinneqarnissaminngarnit sooq paarlatsitut sulerusunnerusarnersut iluamik misissuiffigineqarnikuunngitsoq Peqqissaasut Kattuffiat allappoq. Ilanngullugulu oqaatigalugu ukiumut arlaleriarluni akiliunneqarluni Danmarkiliarsinnaaneq atorfinitsitaanermi atugassarititaasunut attuumassuteqarluinnartoq.
Tamatuma saniatigut pissutaasutut eqqaaneqarput, sulinermi atugassarititaasut, matumani suliamut tunngatillugu ineriartornissamut periarfissat ilanngullugit, inigisap pitsaassusaa, meeqqat atuarfiata fagitigut qaffasissusaa aamma meeqqeriviit ingerlalluarnerat. Aamma ilaquttat ungasippallaarlugit najugaqartarneq. Tassa pissutsit Peqqissaasut Kattuffiata iliuuseqarfigisinnaanngisai pineqartut, Peqqissaasut Kattuffiat, PK allappoq.
