Peqqissaasut nunanit allaneersut ajunngitsorsiassaqartinneqassapput

Peqqissaasut hollandimiut tyskillu atorfininnermut atatillugu qallunaatut ilinniartinneqarnissartik ajunngitsorsiaqaatigissavaat, tamanna Peqqissaasut Kattuffiannit aalassassimaarutigineqarpoq.

- Peqqissaasut marluinnik oqaaseqartut ajunngitsorsiassaqartitaanngillat, Peqqisaasut Kattufiat oqarpoq.

Peqqissaasut nunat allamiut peqqinnissaqarfimmi sulisoriniarutsigit ajunngitsorsiaqartittariaqarpagut, Peqqissutsimut naalakkersuisoqarfimmit oqaatigineqarpoq.

Peqqinnissaqarfimmi sulisut amigaataanerat siorna ukiormannalu ajornartorsiutaavoq, tamatuma kingunerisaanik siniffiit amerlasuut matuneqarput, suliaritinniarlutik utaqqisut aamma amerligaluttuinnarnerannik kinguneqartumik.

Peqqisaasunik naammattunik peqqinnissaqarfimmi sulisussaqanngilaq, nunanilu avannarlerni peqqissaasut peqqinnissaqarfimmi sulilersinnissaannut peqqinnissaqarfik pileritsatsisinnaanani.

Nunat allamiut peqqinnissaqarfimmi sulilersinnaanissaat naalakkersuinermik suliaqartunit kissaatigineqarpoq, taamaattumillu peqqinnissamut naalakkersuisoqarfiup paarlattaasartunik kiffartuussivik suleqatigilerpaa, nunat allamiut peqqinnissaqarfimmi sulilersinnaanissaat anguniarlugu suliniuteqarluni.

Suliniuteqarneq aallartimmat, peqqissaasut Hollandimiut Tyskillu katillutik arfineq-pingasut peqqinnissaqarfimmi aalajangersimasumik atorfeqarniarlutik qinnuteqarput.

- Peqqinnissaqarfimmi sulisunik aalajangersimasumik atorfinitsinneqartussanik nassaarniaqqullugu paarlattaasartunik kiffartuussivik suliakkerparput, Ann Birkekær Kjeldsen Peqqissutsimik naalakkersuisoqarfimmi pisortaq oqarpoq.

Peqqissaasut nunat allamiut Kalaallit Nunaanni peqqinnissaqarfimmi atorfinissagunik, sulisinnaanissaminnut akuersissummik peqartussaapput, soorluttaaq peqqissaasunut kalaallinut qallunaanullu tamanna aamma piumasaqaataasoq.

Taakkua saniatigut qallunaatut kalaallisullu oqaatsinik paasinnissinnaanissaat piumasaqaataavoq.

Peqqissaasut atorfinittussat qaammatini pingasuni sapaatip akunneranut akunnerit 20-it atorlugit qallunaatut ilinniassapput.

- Kalaallit Nunaannut tikikkunik qaammat ataaseq ilinniassapput, sulilernissaminnut akuersissuteqalernissamik tungaanut, taamaattumik Kalaallit Nunaanni aalajangersimasumik atorfininnissartik sioqqullugu annertuumik suliassaqarput, Ann Birkekær Kjeldsen oqarpoq.

Kisianni peqqissaasut kattuffiat, PKK, naammagittaalliormat atorfinititsinissaq unitsinneqarpoq, nunat allamiut atorfinitsinneqarnissaannut ajunngitsorsiaqartitaanissaq isumaqatigiissummi ilaanngimmat.

Taamaakkaluartoq Hollandimiut ukiumi nutaami sulilerunik oqaatsinik ilinniartinneqarnerminni ajunngitsorsiaqartitaassapput.

- Peqqissaasut sulilerunik piareersimanissaat pingaaruteqarpoq. Taamaattumik peqqissaasut Kalalalit Nunaanni sulilernissaat sioqqullugu paarlattaasartunik kiffartuussivik suleqatigalugu qallunaatut ilinniartinneqarnissaat pingaartissimavarput, Peqqissutsimik Naalakkersuisoqarfimmi pisortaq Ann Birkekær Kjeldsen oqarpoq

Nunat allamiut peqqinnissaqarfimmi sulisinnaanerannik suliniut Peqqissutsimut naalakkersuisoqarfimmi januarip qaammataani nalilersorneqassaaq, kiisalu ukiup affaa qaanngiuppat.