Peqqissaasut isumaqatigiissummut naammagisimaarinnipput

PPK-p siulittaasua Karin Holler nuannaaqaaq.

- Aap, ilaana, ilaasortatta angerrassimanerat paasillugu nuanneqaaq, tassami akisimasut 94,3 procentii akuersaarput, Karin Holler aallartippoq.

Peqqinnissaq Pillugu Kattuffimmi peqqissaasut bioanalytikerillu angusarissaassunneqarnerpaallutik, katillugit Kattuffiup ilaasortami akissarsiaasa 19 procentimik qaffannissaat anguaat.

- Maannakkornit ajornannginnerusumik sulisussarsiorsinnaalernissarput ilimagilereerparput. Tassami peqqissaasut amigaataaqisut tunngavissaqarluarluta sulisussarsiariniarsinnaanngoratsigit, oqarpoq.

- Kalaallit Nunaanni peqqissaasut akissarsiaat Nunani avannarlerni akissarsiaritinneqartunut siornatigut unammillersinnaanngivissimapput. Akissaatilunnerat aporfiusarsimaqaaq, kinami akissaatilunnerulerniarluni Kalaallit Nunaannut suliartorusussammat? Maannali neriuutissaqalerpugut. Akissaatit Nunani Avannarlerni akissaatinit qaffasinnerulaartut neqeroorutigisinnaanngorpavut, Karin Holler isumalluaqaluni oqarpoq.

Aamma taartaasartut nalinginnaasut - tassa taartaasartoqatigiit akisoorsuit aqqutiginagit suliartortartut - amerlanerit sivisunerusumik sulisorisalernissaat isumalluarnarnerarpaa.

- Maanna sivikitsuinnarmi taartaajartortartut sivisunerusumik sulinissamut pituttortalernissaat siunertaralugu aapparminnik ilaquttaminnillu Peqqinnissaqarfiup akiligaanik nassarsinnaalernissaat ammaanniarparput. Pineqarput peqqissaasut utoqqaliarsaalereerlutik ukiumut qaammatialunni taamaallaat sulerusuttartut, immaqa aappartik soraarninngoreersoq pillugu. Maannali aapparisartik ilagalugu nunatsinnukarsinnaalissapput. Qaammatinut arfinilinnut amerlanernulluunniit isumaqatigiissiorfigisinnaasattaa akissarsiaat aamma qaffasinnerussapput. Pingaarnerpaavorli nunaqavissut suliinnarnissaat anguniarlugu aamma akissarsiaat qaffattussanngormata, Karin Holler naggasiivoq.

Peqqinnissaq Pillugu Kattuffiit sulisitsisunut isumaqatigiissutaat ukiunut tullernut pingasunut atuuttuuvoq.