Peqqissaasut akissarsiaat qaffanneqartariaqarsoraat

Ilaasortat sulerulupput, ajornartorsiutillu oqilisarniarlugit taartaasartunik atuineq ingerlanneqarallarpoq. Peqqissaasussaaleqinermi ajornartorsiutit qaangerniarlugit iliuuserineqarsinnaasut pillugit Sonja Jensen ima oqarpoq:

-Pissutsit eqqaassagaanni pingaartumillu Sanami pissutsit eqqaassagaanni, maannakkut taartaagallartunik sulisoqarpoq, taakkoqanngippallu sulineq unittoorluinnassangaluarpoq, Sonja Jensen oqarpoq. Aperaarput Peqqissaasut Kattuffiata tungaanniit ajornartorsiutit qaangerniarlugit iliuusissanik qanoq eqqarsartoqarnersoq, imalu akivoq:

- Isumaqarpugut ajornartorsiut qaangerneqassappat peqqissaasut akissarsiaat allallu peqqinnissaqarfimmi suliallit Kattuffimmilu ilaasortaasut akissarsiaat pitsanngorsaavigineqartariaqartut. Kalaallit Nunaannimi akissarsiat Danmarkimut sanilliullugit appasinneerarsuupput, soorlumi sulisussanik atorfeqartitsiinnarnissaq anguniaraanni aamma nunani avannarlerni taamaattoq, Sonja Jensen oqarpoq nangillunilu,

-Akissarsiat appasinnerujuartillugit sulisussanik atorfeqartitsiinnarnissaq ajornassaqaaq, naallu Kalaallit Nunaanni peqqissaasunik ilinniartitsinerit immikkut annertusaaffigineqaraluartut isumaqarpugut, piffissami qanittumi, immaqalu ukiualuit suli ingerlagallassasut peqqissaassaaleqinerup qaangerniarnissaanut, taama oqarpoq Kalaallit Nunaanni Peqqissaasut Kattuffiani allaffimmi pisortaq Sonja Jensen. Aamma oqarpoq, Peqqissaasut Kattuffianiit tupigusuutigigitsik, ajornartorsiut ukiuni arlaqalersuni pioreersoq, peqqissutsimut naalakkersuisup Arkalo Abelsenip aatsaat sapaatip akunnerata siuliani, Dronning Ingridip napparsimavissuata aningaasanik ajornartooqqinnera paasimallugu radioaviisimut oqarmat.

Inatsisartunut ilaasortaq Jonathan Motzfeldt Siumut peqqissutsimut naalakkersuisumut Arkalo Abelsenimut apeqquteqaateqarluni allappoq, Peqqinnissamut sulinerup nalinginnaasup allanngorartinneqannginnissaa anguniarlugu qanoq iliuuseqalersaarnersoq.