Peqqissaasup misigisai pillugit atuakkiaq ullumi saqqummerpoq
Atuakkiaa nammineq ilisimasanit aallaaveqaraluartoq imminut pilluni atuakkiaanngitsoq atuakkiortup erseqqissarpaa.
- Tunumi nunaqarfimmi ukiup ataatsip ingerlanerani pisartut atuakkami eqqartorneqarput, inuit ajunngitsumik ajortumilluunniit inuunerat ersersinniarneqarlutik. Taakku saniatigut angut inuusuttoq peqqissaasoq isummertarnerminik pingaartitsisoq Jespamik ateqartoq tikippoq, nunaqarfimmilu inuunermut, danskit angutit siulerisimasani assigalugit akulerunniarsaraluni. Tamanna iluatsippallaanngilaq, tassami danskit angutit kalaallisut inuuniaraluaraangamik iluatsitsivallaarneq ajormata, angummullu tassunga aamma taamaappoq, taannami Kalaallit Nunaanni inuunermik sungiussivissinnaanngilaq. Tamannalumi inummut tassunga pinani inunnut allanut ajuissumik kinguneqarpoq.
Nunaqarfimmi inuuneq qanoq ittoq atuartussat misigisaqarfigissaneraat naatsumik nassuiaatigeqquneqarmat ima akivoq:
- Nunaqarfiit assigiinngitsut marluk misigisaqarfigissagaat neriuutigaara. Siullertut Jesper qallunaallu allat eqqartornagit oqaluttuani nunaqarfiup piviusorsiortumik isigaluni oqaluttuarineqarnera misigisaqarfigissagaat neriuutigaara. Tullertut nunaqarfik qallunaat isaannit isigalugu oqaluttuaq misigissavaat. Tassani nunaqarfik aallarluinnaavoq, pisut paasiuminaallutillu sakkortusinnaapput, tamakku saniatigut ukiuunerani inuttut qanoq ingerlanerat atugarliuutaallu eqqartorneqarput. Taamaammat Kalaallit Nunaat isiginneriaatsit marluk atorlugit misigissajunnarsivaat.
Atuagaq ”Tunu” sapaatit akunneri arlaqartut qaangiuppata nunatsinni tuniniagaalerumaartoq oqaatigineqarpoq.
Kim Leinep atukkiaa siulleq ukioq 2007-imi saqqummersinneqartoq taaguuteqarpoq "Kalak" atukkiami tassani Kim Leinep 80-ikkunni Kalaallit Nunaanniinnermini misigisani naammattuukkanilu aallaavigalugit atukkiaraa. Atuakkiaq taanna atuakkanik naliliisartunit nersualaarneqarnikuuvoq.
