Peqqissaasunngorniarniaqqusipput

Peqqissaasunik ilinniarsimasunik nunatta amigaateqarnera, nunatta karsianut akisoorujussuuvoq, Danmarkimit sulisussanik taartaagallartussanillu tikisitsisoqartariaqartarmat.

Ilinniarniarluni ulloq qinnuteqarfissaq kingulleq februaarip aallaqqaataata aanaralaarsuanngorpoq. Peqqissaanermik Ilinniarfik nunatta ilinniarsimasunik naammattunik peqqissaasoqalernissaa anguniarlugu immikkut iliuuseqarnerluni:

-Maani ilinniartuunerat pitsaasumik aaqqissuuniartarparput. Illu iserfigigaanni iserfigiuminartussaassooq. Anersaaq pitsaasoq tikilluaqqusisutut ittoq. Atortorissaarutit qarasaasiat allallu pigaagut. Illu qaamasumik ineqarpoq. Pequttat pitsaasut, atuakkanik atorniartarfik amerlasuunik qinigassalik. Aamma neriniartarfeqarpugut, inuk peqqissumik inuussaguni neqeroorutigisariaqarpagut nerisassat. Birthe Abelsen oqarpoq.

Ilisimatitsissutigaa ullaakkorsiutit, ulloqeqqasiutit qiteqquutissallu atuarfimmit aamma isumagineqartartut.

Peqqissaasutut ilinniarneq nunatsinni 1994-imi periarfissaalermalli ulloq mannamut 62-it allagartartaarsimapput. Immaqa ilaasa ikigissagaluaraat, tassaapput nunatsinni peqqissaasutut atorfiit tamarmiusut sisamararterutaat. Ilinnialersartut ukiuni kingullerni pingasuni arfineq-marluk 14-illu akornanniittarput, amerlanerulernissaallu angorusunneqarpoq.

-Uanga isumaga malillugu Peqqissaasutut ilinniarneq qinerneqassaaq eqqarsaatigalugu napparsimasuutigut sanngiitsortagut nunatta paniinit passunneqassammata. Birthe Abelsen oqarpoq.

Peqqissaanermik Ilinniarfimmi atuartut sinerissamit tamarmeersuupput.