Peqqissaasunik amigaateqarneq kræfteqartunut eqquivoq
Nappaammik kræftimik akiuiniaqatigiiffiup Neriuffiup Danmarkimukartitsinerusalerneq ernumanartoqartippaa. Neriuffimmi siulittaasup Johanne Olsenip oqaatigaa, kræftimik nappaateqartut ilarparujussuit massakkut Danmarkimi peqqissariartortinneqartartut, taavalu ilanngullugu isumaqarluni kræftimik katsorsaanerup nunatsinnut nuukkiartuaarlugu suliniutigineqarnera sulisussaaleqinerup kinguneranik unittoortinneqarsinnaasoq.
- Taamaammat tamakkua tusaaniarneqarlutik aningaasaliiffiginissaat pingaaruteqarpoq. Tassami Danmarkiliarluni suliaritinnermi avatangiisit apeqqutaasartorujussuupput, nunatsinniilluni peqqissartinneq ilaatigut eqqissipallannermik kinguneqartarpoq, tassami avatangiisinit ilisarisimasanillu alakkarneqartarneq napparsimasumut pingaaruteqartorujussuuvoq, nappaammik eqqorneqarluni ernumanerujussuaq pilersarmat, Johanne Olsen oqarpoq.
Taamaammat Peqqinnissaqarfimmi suleqatigiissitaq suligasuartussaq piaartumik aaqqissutissanik piviusunngortitsiniarumaartoq, Neriuffiup kissaatigaa.