Peqqissaasoqatigiit: - Isumaqatigiissutip nutaap unammillersinnaalersippaatigut
- Ilungersorluta qaammatit pingajuat affaq isumaqatigiinniareerluta angusarput naammagisimaaqaarput.
Isumaqatigiissut ataatsimut isigalugu naammagisimaarinneqaagut.
Peqqissaasut siulittaasuata Karin Hollerip angusaq Nunani Avannarlerni peqqissaasoqatiminnut akissarsiatigut naleqquussanermut aallartinissaataanerarpaa.
Akissarsiavut Nunani Avannarlerni peqqissaasut akissarsiaannut naapertuuttumik maanna qaffanneqarput.
Akissarsianik qaffaanerup kingunerisa ilagissavaat avataaniit peqqissaasut maanga suliartorniarnerminnut akissarsiat aporfigisinnaajunnaarmatigik. Taamaattorli namminersorlutik peqqissaasunik paarlatsissanik isumaginnittartut akissaataannut suli inorsarpugut.
Namminersornerullutik Oqartussallu isumaqatigiissuterput tunngavigalugu ilaasortavut qaammammut immikkut tapisisalissapput, taamaasillutik peqqissaasunut allanut akissarsiamikkut nallersuussinnaalerlutik. Peqqissaasut namminersortunit attartortarneri pisariaarupput.
Peqqissaasullu paarlattaasartussat kikkuuneri apeqqutaatinnagit akissarsiaat assigiisinneqartut, peqqissaasut siulittaasuat Karin Holler oqarpoq.
Peqqissaasut kattuffiannut peqqissaasunut ikiortit ilaasortaanermikkut ilaasortaqaqatitik assigalugit ukiumut akeqanngimik angalasinnaalerput. PPK-p isumagisaanik peqqissaasut ikiortaallu 430-t missingi ilaasortaapput. Isumaqatigiissut nutaaq ilaasortanit juunip ulluisa 22-anni taasissutigineqassaaq.