Peqqissaanermik Ilinniarfiup ilassutaa atoqqaartinneqarpoq

Peqqissaanermik ilinniagallit, tassalu sundhedsassistentit, peqqissaasut sundhedshjælperillu ataatsimut ilinniarfeqalerput. Ilinniarfitoqqap nutaamik ilaneratigut tamanna piviusunngortinneqarpoq. Ilinniarfiup illutaata nutaap atortorissaarnerunera, silaannarinnera qaamaneruneralu, ilinniartunit iluarineqarpoq.

Emma Pîvât, sundhedsassistentimut ilinniartoq, illup iluata atortorissaarnerunera, silaannarinerunera minnerunngitsumillu qaamanerunera assut iluaraa.

Ilinniaqataata Nuka Heilmannip, ilinniakkat assigiinngitsuugaluartut, ataatsimoorlutik ilinniarfimmiilernertik iluassangatippaa. Siunnerfitsik ataasiummat, ataatsimoorneq pitsaassanerarlugu, Peqqissaanermik Ilinniarfiup pisortaata, Ann Birkekær Kjeldsenip oqaatigaa, ilinniakkat assigiinngitsut ataatsimuulerneranni ilinniartitsisunik atorluaanerulissallutik. Minnerunngitsumillu ilinniartut akornanni  ilinniarusussutsip  ineriartortinnerani pingaaruteqassasoq.

Ann Birkekær Kjeldsenip ilanngullugu oqaatigaa, peqqissaasunngornianik amerlanerusunik  ilinniartoqarsinnaagaluarlutik, qinnuteqartartulli piginnaasaat aporfiusartoq.

Sundhedsmedhjælperit ilinniartitaanerat pisoqaq 1966-imi aallartinneqarsimasoq, 1993-imi taamaatinneqarpoq. 1996-imit ullumimut peqqissaasut 55-it ilinniakkaminnik naammassinnissimapput.

Nuna tamakkerlugu peqqissaasut 220-it atorfeqarsinnaapput.