Peqqinnissaqarnermi aningaasat atorluarneqarsinnaapput

Inuit peqqissuunissaat, atorfinitsitsineq ilinniartitaanerlu peqqinnissaqarfimmi ajornartorsiutit aaqqiiviginissaanni pingaarnerpaapput, Tamanna Kalaallit Nunaanni peqqinnissaqarfimmi aningaasaqarneq pillugu nalunaarusiami, Deloitte Business Consultingip suliaani aalajangiunneqarpoq.

- Siullermik atorfinitsitsinissaq ilinniartitaanerlu aappassaattullu innuttaasut peqqinnissaat, tassaasoraavut suliassaqarfiit taakkuusut ajornartorsiutini paasiuminaatsuni ajornakusoornerpaajusutut pingaarnerusutullu erseqqinnerusut, Deloitte Business Consultingimi seniormanager Sten Daugård, peqqinnissaqarfimmi aningaasaqarnermik misissueqqissaarnermik suliaqarsimasoq taama erseqqissaavoq.

Tassalu imaappoq Kalaallit Nunaanni peqqinnissaqarfimmi amerlanerujussuit ilinniartittariaqartut, tamannalu naammassisinnaanngikkutsigu nunanit allanit pissarsiortariaqarluta.

- Ilinniartitaanermi nalinginnaasumi peqqissaasunillu ilinniartitsinermi aammalu peqqinnissaqarfimmi ilinniartitaanerni allani ilinnialersartut sapinngisamik amerlanerpaanngortinneqarnissaat ilungersuutigineqartariaqarpoq, peqqinnissaqarfimmilu nalinginnaasumik ilinnialersussat taakkua amerlisinnissaanni piffissaqarnissaq allarluinnaq takorloorneqarsinnaalluni.

- Aappaattut tikkuagarput tassaavoq taartaasartut sulisullu nunani allaninngaanniit tikisinneqartarnerulernissaat, mannalu tikillugu atorfinitsitsisarneq pingaartumik Danmarkiminngaanniit aammattaarli nunanit avannarlernit pisarluni.

- Taavalu pujortarunnaarluta peqqinnanngitsunillu neriunnaarluta timersornerulissaagut, taamaaliornikkummi inuit peqqinnerulernissaat qulakkeerneqarsinnaavoq, taamalu peqqinnissaqarfik aningaasartuutikinnerulerluni, Steen Daugaard oqarpoq.

Manna tikillugu peqqinnerulersitsiniarluni pinaveersaartitsillunilu suliniutaasuni kissaatigineqartutut naammassineqartut naammaginannginnerannut takussutissat amerlaqaat, taakkualu pitsanngortinneqarpata peqqinnissaqarfiup aningaasat assorsuaq iluaqutigissagaluarlugit, Sten Daugård naggasiivoq.

Nalunaarusiaq maanna peqqinissaqarfiup aningaasaqarnerata siunertamut samminerusunngortinnissaa pillugu naalakkersuinikkut isumaliutersuutinut ilanngunneqassaaq.