Peqqinnissaqarfiup Nuummi innuttaasunut nalunaarutaa aallarniutigissavarput
Pinartoqassappat Dronning Ingridip Peqqissaavia attaveqarfigineqassasoq kajumissaarutigineqarpoq, Peqqissaaviullu normoraa 34 40 00, tassa 34 40 00.
Inniminniinerit nalinginnaasut aqagumut sisamanngornermut oktobarip ulluisa 16-iannut utaqqissuteqquneqarnerat, ilanngullugu aamma nalunaarutigineqarpoq.
Nakorsamut oqarasuaat sapaatip-akunnerata ingerlanerani ajoquteqallattaarpoq, ullumilu tassa atorsinnaajunnaavissimaneranik tamanna kinguneqarsimalluni. Peqqinnissaqarfiup qitiusumik immikkoortuani nakorsat pisortaat Jesper Olesen taama nalunaaruteqarpoq, Tele-Postillu attavigineqareersimanera ilisimatitsissutigalugu, nakorsamullu attaveqarsinnaanerup aqagumiit aaqqinneqarsimanissaa neriuutigineqarluni.
Nuummi innuttaasut nakorsaatinik pissarsiniartut, misissortinnerit inernerinik paasiniaaniat, aalajangersimasunillu annikitsunik saaffiginnissuteqarniat qarasaasiakkut saaffiginnissinnaapput, www.doktor.gl aqqutigalugu saaffiginnissinnaallutik.