Peqqinnissaqarfiup droneq nakorsaatinut atugassaq misilittarpaa

Peqqinnissaqarfik droneq nutaaq Falck suleqatigalugu misilittarlugu aallarteruttorput. Droneq nutaaq tallimanngormat siullermeerluni Dronning Ingridip Napparsimmavissuaniit Kapisilinnukartinneqarpoq.

Droneq 4 meterisut takisussuseqarpoq, nakorsaatinut assigisaanullu sineriammi nassiussinermut atorneqartassaaq.

Suliniut nutaaq taanna takorloorneqarpoq siunissami nakorsaatinik aaversinnernillu angallassisassasoq.

Silarluttumi timmisinnaasoq

Nunatta silaa peqqarniissinnaasaqaaq, aammik misissugassamik nassiussinermi iisartakkanilluunniit assartuutitut ernumananngitsoq Jesper Olesen nassuiaavoq.

- Taakkoqqissaat dronemik assartorneqarsinnaalluarput. Aak misissugassaappat poortorluarsinnaavarput, taamaaliornikkut Kalaallit Nunaata issersua akornutiginagu angallanneqarsinnaapput.

Suliniut nakorsaatinik aaversinnernillu drone atorlugu angallassisinnaanngorneq, suliffeqarfik Falck suleqatigalugu pinngorsinnaasimavoq.

- Napparsimasorujussuarnik sullissaqartilluta ilaanni nalilersuilluartariaqalersarpugut, ilumut nakorsiaq angallatissavarput. Imaluunniit aaviinnariarlugu akissutissat pissarsiarisinnaavagut? Tassaniluuna drone iluaqutigisussaagipput, Jesper Olesen oqarpoq.

Nunatsinnullumi naleqquttoq Falckimi ineriartortitsinermut pisortap, Nicolai Laugesenip oqaatigaa.

- Drone Kalaallit Nunaanni isorartuumi timmisinnaavoq. Silarluttumilu aamma issittumi angalasinnaalluni. Nunaqarfinnukartinneqarsinnaavoq, assersuutigalugu maani Nuup eqqaanut Kapisilliartinneqarsinnaalluni.

Kapisilimmiut alutorsaqaat

Drone Nuummiit aallarnerminiit nalunaaquttap akunnera ataaseq qaangiuttoq kapisilinnut mittoq Kapisilimmiunit arajutsineqanngilaq.

- Takusarput alutornaqaaq. Aatsaat taamaattumik takugatta, Judithe Mikkelsen oqarpoq.

Nunatsinni dronimik misileraanneq iluatsissappat, taamatullu atorneqarnisamisut atorneqalissappat, Kapisilimmiup iluaqutaanissaa takorloorluarsinnaavaa.

- Tassa iluassaqaaq siunissami atulissagunikku taanna dronerannguaq, timmisartuaraq. tassa ajorunanngilaq. Iluaqutaassaqaaq Judithe Mikkelsen taama KNR-imut oqarpoq.

Drone nalunaaquttat akunnerini arfinilinni timmisinnaavoq, 400 kilometerisut isorartussusilimmut timmisinnaalluni,.

Taanna 5 kilonik angallassassaminik usisinnaalluni.

Sekundtimut 23-mut sukkassusilimmi 20-inillu issittumi timmisinnaasutut misiligarneqarnikuuvoq.

Taakkuinnaanngillalli dronermi taanna siallersumi apisumilu aamma ingerlasinnaavoq.