Peqqinnissaqarfiup aqunneqarnera pillugu politikerit apeqquteqarput
Kattusseqatigiit Partiiata Inatsisartunut ilaasortaatitaa Anthon Frederiksen Naalakkersuisut SANA-p matuneqannginnissaa pillugu qanoq iliuuseqarniarnersut Inatsisartut suleriaasianni § 36 imm. 1 naapertorlugu apeqquteqaateqarpoq.
- Dronning Ingridip Napparsimmavissuani pisut inuiaqatigiinni aalassassimaartitsipput toqqissisimanngititsillutillu. Taamaammat Kattusseqatigiit Partiianiit iluarsiissutissanik ujartueqataajumalluta Naalakkersuisunut apeqquteqarpugut, Anthon Frederiksen allappoq.
Inatsisartunut ilaasortaq alla, Jonathan Motzfeldt, Siumumeersoq Peqqissutsimut naalakkersuisumut Ark’alo Abelsenimut aamma apeqquteqaateqarpoq, peqqinnissamut sulinerup nalinginnaasup allanngorartinneqannginnissaa anguniarlugu qanoq iliuuseqalersaarnersoq paasiniarlugu.
SANA-mi taartaasartunut atuivallaarsimaneq pissutigalugu upernaaq 17 millioni koruuninik aningaasaleeqqittoqareerpoq.
- Inatsisartuni ilaasortatut paaserusunnarsivoq aningaasarpassuit ilumut atorfissaminnut atorneqartarnersut. Kinaluunniit ajutoornermik nalaataqartoq nakorsanit ingerlaannartumik nakorsarneqarnissaminut periarfissaqartuarnissaa politikeritut – inuiattullumi pingaartitaraarput. Aningaasalli atugassaatitaasut killeqarmata eqqortumik atuineq aamma pinngitsoorneqarsinnaanngilaq, Jonathan Motzfeldt allappoq.
