Peqqinnissaqarfimmut sunniinerusariaqartugut

Innuttaasut peqqinnissaqarfinni sunneeqataanerusariaqartut, Peqqissutsimut naalakkersuisoq Asii Chemnitz Narup isumaqarpoq. Taamaammat atorfilittaminut misissueqqusilluni suliakkiivoq. Angorusunneqartunut ilaavoq nakorsiartarfiup napparsimaviullu aqunneqarnerani innuttaasut peqataanerunissaat, assersuutigalugu siulersuisuni ilaasortaanikkut. Tamanna qinikkatut Asii Chemnitz Narup-ip akisussaaffiginnginneraa aperigatsinni ima akivoq:

-Soorunami akisussaaffigivarput, aamma inatsisartutigoortumik naalakkersuisunilu akisussaaffeqartoqarpoq, peqqissutsimullu naalakkersuisoqarfimmi aamma pitsaasumik naammassiniartarparput. Kisianni qitiusoqarfimmit inunnik ikittuararsuarnik oqartussaaffeqartitsilluni nunatsinni ingerlatsinerput, isumaqarpunga mutiuvallaarunnaartoq. Aamma pissusissamisoornerusoraara akisussaaffik siammarneqarnissaa, Peqqissutsimut naalakkersuisoq Asii Chemnitz Narup oqarpoq.

Inuiaqatigiinni allani napparsimaveqarnermi nutaaliaanerusumik ingerlatsisut malinneqartariaqartut Asii Chemnitz Narup aamma oqarpoq. Tassani innuttaasut qaninnerusumik suleqatigineqartarput. Assersuutigalugu suut napparsimaveqarnermi pingaarnersiorneqassanersut, innuttaasunit sunneeqataaffigineqartarput.