Aningaasanut inatsit 2018: Peqqinnissaqarfimmut amerlanerusunik aningaasaliisoqassasoq
Napparsimasut amerleriaateqarneri, katsorsaariaatsit nutaat nakorsaatillu akisunerusut pisariaqartinneqarneri Naalakkersuisut siunnersuuteqarnerminni tunngavilersuutaasa ilagaat.
Peqqinnissaqarfimmut aningaasartuutit amerligaluttuinnarput. Inuuneqqortusiartorneq isiginiaraanni peqqinnissaqarfimmut aningaasartuutit procentinik 13-inik 2040-p tungaanut qaffassimassasut, Naalaakkersuisut aningaasanut inatsisissatut siunnersuutaanni atuarneqarsinnaavoq.
AAMMA ATUARUK Peqqinnissaqarfik nakorsatut qullersartaarpoq
Inatsisissatut siunnersuut qimerlooqqikkaanni Dronning Ingridip Napparsimmavissuanut aningaasaliissutit 13 millionit koruuninik ukioq maannamiit amerlanerusunik aningaasaliiffigineqassasoq siunnersuutigineqarpoq. Taakku napparsimasunut angallassinermut qimarngutitsinermullu atorneqarnissaat siunniunneqarluni.
- Peqqinnissaqarfiup aningaasaqarnera ataatsimut isigalugu tatisimaneqarpoq, aningaasanut inatsisissatut siunnersuummi allassimavoq.
Peqqinnisaqarfiit aningaasartuutaasa amerligaluttuinnarneri ikilisikkumallugit Naalakkersuisut pinaveersaartitsinerit aamma suliniutiginiarpaat. Aningaasanut inatsisissatut siunnersuut naapertorlugu inuiaqatigiit peqqissusaat pitsanngoriaateqarpat aningaasartuutinik sipaartoqarsinnaammat.
Taamaammat suliniut MANU aningaasaliiffigineqarpoq. Taanna nuna tamakkerlugu siullermeerlutik angajoqqaanngortussanut pikkorissaanermut neqeroorutaavoq. Naartulernermit marluk tikillugit ukiulinnik meerallit angajoqqaanngorluni unammillernartut piareersimaffiginissaannik pikkorissaaviulluni.
AAMMA ATUARUK Peqqinnissaqarfimmi pujortartartukillissasoq
Angajoqqaat pikkorissarneqarnerisa kingunerannik meeqqat paarilluarneqalernissaat siunertaavoq, meeqqammi paarilluarneqarunik napparsimalernissaraluat inuunerminnilu ajornartorsiuteqalersinnaanissaat pinaveersaarneqarsinnaavoq, taamaasilluni aningaasartuutit amerliartornerat unikaallatsinneqarsinnaalluni.
Pinaveersaartitsinerit iluatsippata peqqinnissaqarfimmut aningaasaliissutit 10 procentinik sipaarfiusinnaasut peqqissutsimut naalakkersuisoqarfiup missingersuusiaani atuarneqarsinnaavoq.
