Peqqinnissaqarfimmiunut akissaatigineqartussat isumaqatigiissutigineqartut
Namminersorlutik Oqartussat, kommunit aamma Peqqinnissaq Pillugu Kattuffiit ulluni 12-ini sakkortuumik isumaqatiginninniareerlutik ukiuni sisamani atuuttussamik akissarsiat pillugit tallimanngormat unnukkut isumaqatigiissuteqarput.
Taama illuatungeriit sisamanngornermi tusagassiuutinut nalunaaruteqarput.
- Isumaqatiginninniarnerit angusaqarusussuseq aallaavigalugu sakkortuumik ingerlanneqarput, taama PPK-mi siulittaasoq, Ken Jensen, oqarpoq.
Isumaqatiginninniarnerni atorfinitsitsisarneq sulisullu sulisoriinnartarneri qulequtarineqarput. Isumaqatigiissutigineqartullu naapertorlugit peqqinnissaqarfimmi sulisut tunngaviusumik akissarsiaat qaffariarput soraarnerussutisiassanullu annertunerusumik akiliuteqartalerlutik.
- Tamatuma saniatigut angajoqqaanngorlaat akissarsiaqaannarlutik sapaatit akunnerinik marlunnik sivisunerusumik sulinngiffeqarsinnaalerput, taamaasillutillu PPK-mi ilaasortat Kalaallit Nunaanni kattuffinni isumaqatigiissuteqarfigineqartartuni sivisunerpaamik erninermut atatillugu sulinngiffeqartalerlutik. Pineqartut saniatigut ilinniartarnernut tunngassuteqartut annertunerusumik suliniuteqarfigineqassapput, pisortanut tunngasut ukkatarineqarnerulissapput allaffissornerlu pisariillisarneqassalluni, taama nassuiaapput PPK-imi siulittaasoq, Ken Jensen, aamma sulisitsisut isumaqatiginniartitaanni pisortaq Frederik Schmidt.
Isumaqatiginninniarnerni angusat PPK-p ilaasortaanit taasissutigineqassapput Naalakkersuisunillu akuerisassanngortinneqarlutik.
Taasisitsinermit angusat marsip ingerlanerani pissarsiarineqarsinnaanissaat naatsorsuutigineqarpoq.
Isumaqatigiissutissaq ilaasortanit akuerineqassappat akissarsiat pillugit isumaqatigiissut 1. april 2020-mit 31. marts 2024-ip tungaanut atuutsinneqalissaaq.
Peqqinnissamik suliallit atugaat pillugit isumaqatigiinniarnerit matuma siulii isumaqatigiissutaasut atorunnaarnerannit ukiut pingajuat affanngortoq aatsaat isumaqatigiissummik inerneqarpoq.
