Peqqinnissaqarfimmi sulisut piginnaanngorsarput
ATLS-imik taaguuserlugu pikkorissartitsineq, siornatigut Kalaallit Nunaanni ingerlanneqarsimanngitsoq Nuummi Droninng Ingridip napparsimaviani ingerlanneqassaaq.
Nakorsat pilattaasartullu misilittagaqarluartut Rigshospitalimeersut qulit pikkorissaasuussapput.
- ATLS isumaqarpoq Advanced Trauma Life Support. Pikkorissartitsinermi nakorsat peqqissaasullu ajutoorujussuarsimasunik annaassiniarnermi sukumiisumik sungiusarneqassapput, nakorsaaneq Jacob Kanstrup nassuiaavoq.
Pikkorissartitsinissaq sooq pingaaruteqarpa?
- Pikkorissartitsineq pingaaruteqarpoq, ajoqusersimasunik tuaviortumik pitsaanerpaamillu ikiuisinnaanissamut periarfissiissammat, Jacob Kanstrup oqarpoq.
Pikkorissartitsineq sullissilluarnerulernissamik kinguneqassasoq, Jacob Kanstrupip ilanngullugu oqaatigaa.
- Isumaqarluinnarpunga, innuttaasunik sullissineq pitsaanerulissasoq, peqqissaasut nakorsallu pikkorissarnermikkut, ajutoortoqarsimatillugu inunnillu aqqunartoqarsimatillugu, annaassiniarnermi periutsit eqqortut atornissaat qanoq pingartigisoq paasisimalermassuk, Jan Kanstrup oqarpoq.
Pikkorissaanermi kujataanit, avannaaniit tunumiillu peqataasoqarpoq.