Peqqinnissaqarfimmi sulisut akissarsiaat 19 procentimik qaffassapput
Sermitsiap nittartagaani allassimasoq naapertorlugu akissarsiat katillugit 19 procentimik qaffassapput, kisiannili peqqissaasut, peqqinnissamut ikiortit, ernisussiortut assigisaanillu atorfillit allat sisamat akornanni aningaasat taakku qanoq agguataarneqassanersut suli ersarissinngitsoq, Sermitsiami allaaserineqarpoq.
Peqqinnissaq Pillugu Kattuffimmi siulittaasup, Karin Hollerip, oqaatigaa, isumaqatigiissut tassaasoq, Nunatsinni Nunanilu Avannarlerni allani peqqinnissaqarfinni sulisut aningaasarsiaasa assigiinnginnerujussuisa assigiissarneqarnissaannut tikkuussisoq.
- Isumaqatigiinniarnerit inernerat naammagisimaarparput, ilaasortavut akuerseqqullugit kaammattorusuppavut, Karin Holler erseqqissaavoq.
Isumaqatigiinniarnerit inernerisa kingunerinik, qaammammusiat qaffangaatsiassapput, immikkut tapisiat qaffanneqassallutik, erninermut atatillugu sulinngiffeqarnernik aaqqissuussineq pitsaanerulissalluni, sulinngiffeqartarneq ullunik marlunnik sivitsorneqassalluni, aamma sulisut 55-it sinnerlugit ukiullit sulisarnerat immikkut aaqqiivigineqassaaq, taakkununnga naleqqussarlugu, kiisalu taartaasartunut misiligummik aaqqiisoqassaaq.
