Peqqinnissaqarfimmi sulisussarsiorneq iluatsikkiartorpoq
Peqqissutsimut naalakkersuisoqarfimmi pisortap Ann Birkekær Kjeldsenip suliassanngortitsineq oqaaseqarfigiumanngilaa, Peqqinnissaqarfiulli sulisussarsiornera maanna iluatsikkiartortoq oqarpoq:
- Peqqinnissaqarfimmut sulisussarsiornerput ukioq manna siornalu annertusivarput. Paarlattaasartut aqqutigalugit atorfillit saniatigut aamma ikiliartorput. Nunarsuaq tamakkerlugu aningaasarliornerup kingunerisaanik pisortat suliffeqarfiutaanut noorarnertut amerliartornerat aamma iluaqutigaarput, Ann Birkekær Kjeldsen oqarpoq.
Paarlattaasartut tunuliaqutaralugit atorfillit ukiup massuma aallartinnerani 40-simariarlutik maanna 15-iinnaapput.
Isumaqatigiisitsiniartartumut suliassanngortitsineq suli ingerlammat Ann Birkekær Kjeldsen tamanna pillugu oqaaseqarumanngilaq, soorlu aamma nunani allaneersunik sulisussarsiorneq pillugu oqaaseqarumanngitsoq, ajornartorsiut tamanna suliamut attuumassuteqarluinnarmat.
Peqqissaasulli nunani allaneersut suliniummi ilaasut suli piukkoornerarpai, januaarillu aallaqqaataani sulilersussat tikilluaqqullugit.
Peqqissaasunik nunani allaneersunik atorfinitsitsiniarneq ajornartorsiorfiusoq, KNR-miit paasivarput. Peqqissaasut arfineq-pingasut aallaqqaammut peqataagaluarput, ippasigamilu oqaluttuaraarput sisamaannaasut.
Peqqissaasut nunani allaneersut Dronning Ingridip Napparsimmaviani atorfinittussaagaluartut aamma uniinnarsimapput. Tassalu peqqissaasut oqaatsinik pikkorissarnertik pikuinanaarsimavaat.
Peqqissaasut Namminersorlutillu Oqartussat akornanni maajimi isumaqatigiissutaat naapertorlugu akissarsiassat ukiut tulliit pingasut ingerlanerini 19 procentinik qaffassapput, sulisussarsiornermullu tamanna iluaqutaavoq:
- Sulisussarsiorneq eqqarsaatigalugu nunat allat unammillerfigisinnaanngorpagut, naak taakku aamma sulisussaaleqigaluartut. Assigiinngissut tamanna maanna atuukkunnaarpoq, Peqqissutsimut naalakkersuisoqarfimmi pisortaq Ann Birkekær Kjeldsen Radioaviisimut unnersiorpoq.
Peqqissaasut 20-t Peqqinnissaqarfimmi amigaataapput.
