Peqqinnissaqarfimmi pitsanngorsaanissaq oqaluuseraat

Peqqinnissaqarfimmi aqutsisut Qaasuitsup Kommunianiit, Qeqqata Kommunianiit, Kommuneqarfik Sermersuumiit Kommuni Kujallermiillu ulluni tallimani naapinnertik naammasseqqammerpaat. Eqqartugaasalu ilagaat napparsimasut pisinnaatitaaffii, nakorsat suleriaasii, nakorsianut ilitsersuutit, peqqinnissaqarfimmi aqutsisut aaqqissuussaanerisa pitsanngorsarnissaat aningaasallu qanoq agguataarneqarsinnaaneri. Dronning Ingridip Napparsimavissuani Nakorsat pisortaat Karsten Thordahl oqarpoq:

- Qanoq iliorutta pitsaanerusumik assigiiaanerusumillu sullissisinnaanerput eqqartorparput. Misilittakkatsinnik avitseqatigiilluta sulineq aallartinniassagatsigu. Unammilligassatta annerpaartaraat innuttaasut ajunngitsumik nakorsarneqartarnissaat suliassattalu agguataarnerunissaat. Nutaajunngillat kisianni pitsaanerusumik suliarisinnaavagut, Karsten Thordahl oqarpoq.

Nunaqarfinni innuttaasut alimasissumik nakorsiartitsineq atorlugu ukiuni qaninnerni pitsaanerusumik nakorsarneqartalernissartik ilimagisinnaavaat. Atortorissaarut atorlugu nakorsiat sukkanerusumik suliarineqarsinnaalissapput sivikinnerusumillu utaqqisalissallutik.

- Alimasissumik nakorsiartitsinerup atorneqarnera ukiuni aggersuni pitsanngorsarneqassaaq. Atortorissaarut atorlugu nakorsiartitsinerni misissuisinnaalissaagatta, Nakorsat pisortaat Karsten Thordahl oqarpoq.

Peqqinnissaqarfimmi aqutsisut ukioq manna marloriarlutik naapipput. Kommunerujussuit pilersinnerisa kingorna februarimi aamma naapeqqissapput.